'ट्रॅक्टर आमचा, डिझेल तुमचे', बच्चू कडूंच्या योजनेचा शुभारंभ, १९१ महिलांना होणार मदत

अकोला : 'ट्रॅक्टर आमचा, डिझेल तुमचे' पालकमंत्री बच्चू कडू यांच्या अभिवन योजनेचा आज शुभारंभ झाला आहे. पालकमंत्री राज्यमंत्री तथा अकोल्याचे पालकमंत्री बच्चू कडू यांच्या हस्ते आज अकोट तालुक्यातील वरुळ-जाउळकामधून या उपक्रमाला सुरवात झाली आहे. जिल्ह्यातील निराधार, विधवा आणि आत्महत्याग्रस्त शेतकरी कुटुंबांतील महिलांना आधार मिळावा म्हणून पालकमंत्री बच्चू कडू यांच्या पुढाकाराने ही योजना राबविण्यात येत आहे.

जिल्ह्यातील तब्बल १९१ महिलांना 'ट्रॅक्टर आमचा, डिझेल तुमचे' या योजनेअंतर्गत मदत पुरवली जाणार आहे. शेतकरी कुटुंबात पतीच्या मृत्युनंतर कुटुंबाचा उदरनिर्वाह वेळ महिलांवर येते. पण नांगरणी, वखरणी, पंजी आणि पावसाळा सुरू झाल्यावर पेरणीसाठी पैसा आणायचा कुठून? असे अनेक प्रश्न त्यांच्या समोर उभे असतात. या पार्श्वभूमीवर बच्चू कडू यांच्या प्रयत्नाने 'ट्रॅक्टर आमचा, डिझेल तुमचे' या योजनाचे शुभारंभ करण्यात आला. या योजनेच्या उद्घाटनावेळी चक्क बच्चू कडू यांनी शेतात ट्रॅक्टर चालवत नांगरणी केली.