आमदार अमोल मिटकरी यांच्याविरुद्ध गुन्हा दाखल

म. टा. वृत्तसेवा, अकोलाः वडिलाचे अंत्यसंस्कार केलेल्या जागेवर सिमेंटचा चबुतरा बांधून विठ्ठल मूर्तीची स्थापना केल्यावरून आमदार अमोल मिटकरी यांच्याविरुद्ध दहीहंडा पोलिस ठाण्यात गुन्हा दाखल करण्यात आला आहे. या प्रकाराने धार्मिक भावना दुखावल्याचे कारण समोर करीत भाजपचे जिल्हा सरचिटणीस विजयसिंह सोळंके यांनी न्यायालयाचे दार ठोठावले. यावर निर्णय देताना आ. मिटकरींविरुद्ध गुन्हा दाखल करण्याचे आदेश देण्यात आले.

अकोट तालुक्यातील कुटासा येथील आमदार अमोल मिटकरी यांचे वडील रामकृष्ण यांचे २७ सप्टेंबर २०१८ला निधन झाले. शेतातच अंत्यसंस्कार करण्यात आले. कुणाचीही परवानगी न घेता सिमेंटचा चौथरा बांधून विठ्ठल मूर्तीची स्थापना केली. या प्रकारामुळे धार्मिक भावना दुखावल्याचे कारण पुढे करीत भाजपचे जिल्हा सरचिटणीस विजयसिंह सोळंके यांनी दहीहंडा पोलिस ठाण्यात तक्रार दिली होती. मात्र पोलिसांनी कुठलीही कारवाई न केल्याने न्यायालयात याचिका दाखल केली होती. न्यायालयाने आमदार मिटकरी यांच्याविरुद्ध गुन्हा दाखल करण्याचा आदेश दिला. यानंतर पोलिसांनी गुन्हा दाखल केला.