माहेरहून पत्नी पुन्हा नांदायला; रात्री कडाक्याचं भांडण; पती पहाटे उठला अन् अनर्थ घडला

अकोला: दारुड्या पतीने आपल्या पत्नीवर कुऱ्हाडीने वार करून तिला गंभीर जखमी केले. पतीच्या हल्ल्यात पत्नीचा मृत्यू झाला. अकोला जिल्ह्यातील शेकापूर गावात आज (गुरुवारी) पहाटे चार वाजताच्या सुमारास ही घटना घडली. गोपीचंद राजाराम चव्हाण (वय ३५, रा. शेकापूर ता. पातुर, जि. अकोला) असं मारेकरी पतीचे नाव आहे. तर संगीता गोपीचंद चव्हाण (वय २८) असं मृतक पत्नीचं नाव आहे. सुत्रांच्या माहितीनुसार मृतक महिलेने अनेकदा पातूर पोलिसांत पतीविरुद्ध तक्रारी दिल्या. मात्र वेळीच ठोस पाऊले न उचलले गेल्याने आज २ मुलांनी आईचं छत्र गमावलं आहे.

काय आहे संपूर्ण घटना ?
आरोपी गोपीचंद आणि संगीताचा विवाह मागील ८ वर्षांपूर्वी झाला. काही दिवस संसार सुरळीतपणे सुरू असताना गोपीचंदला दारूचे व्यसन लागलं. त्यामुळे दोघांमध्ये नेहमी किरकोळ कारणांवरून वाद व्हायचे. गोपीचंद नेहमी दारू पिऊन संगीताला मारहाण करत तिच्यावर संशय घ्यायचा. या प्रकरणी संगीताने पातूर पोलीसांत पतीविरुद्ध ३ वेळा तक्रारीसुद्धा दिल्या होत्या. परंतु पातूर पोलिसांनी कोणत्याही प्रकारची ठोस कारवाई केली नाहीय. अखेर संगीता दोन मुलांना (अर्जुन आणि अंशुमन) घेऊन तिच्या माहेरी शेकापूरला निघून गेली. काही दिवसांनी संगीता गोपीचंदसोबत नांदायला गेली. त्यानंतरही त्यांच्यात वाद व्हायचे.
तरुणाकडून होणाऱ्या बायकोचं तब्बल ८ महिने अपहरण; तरुणीच्या आईनं सांगितलं धक्कादायक कारण
काल (१२ ऑक्टोबर) रात्री पती-पत्नीमध्ये कडाक्याचे भांडण झाले. रात्री झोपी गेल्यावर गोपीचंद आज गुरुवारी पहाटे ४ च्या सुमारास झोपेतून उठला आणि कुऱ्हाडीने संगीताच्या डोक्यात, मानेवर आणि पायावर वार केले. या हल्ल्यात संगीता गंभीर जखमी झाली आणि तिच्या जागीच मृत्यू झालाय. आता या प्रकरणात पातुर पोलीस ठाण्यात संगीताचे वडील रामचंद्र देवा राठोड यांच्या तक्रारी वरून खुनाच्या गुन्ह्यासह विविध कलमान्वये गुन्हा दाखल केला असून मारेकरी पतीला अटक करण्यात आली आहे.
मृत वाघावर जमावाचा हल्ला; केस ओढले, काठ्यांनी मारले; तब्बल हजार जणांवर एफआयआर
आरोपी गोपीचंद चव्हाणवर या अगोदर सासरे रामचंद्र राठोड यांना मारहाण केल्याने आणि शेताजवळ असणाऱ्या व्यक्तीला मारहाण केल्याप्रकरणी ३२४ कलमांतर्गत गुन्हे दाखल आहेत. गोपीचंद चव्हाण याची गुन्हेगारीची पार्श्वभूमी असूनही, मृतक संगीताने पोलिसांत तक्रारी दाखल करूनसुद्धा कारवाई झाली नाही. अखेर आज संगीताला आपला जीव गमावावा लागला. संगीताच्या तक्रारीची गंभीर दखल वेळीच घेतली गेली असती तर आज ही वेळ आली नसती, अशी चर्चा गावात आहे.