वंचितला धक्का, पांडे गुरुजींचा भाजपमध्ये प्रवेश, लगेच रिटर्न गिफ्टही मिळालं!

अकोला : अकोल्यात वंचितला धक्का बसलाय. अकोल्याचे माजी जिल्हा परिषद शिक्षण सभापती चंद्रशेखर पांडे गुरुजी यांनी अकोला महानगरपालिका तोंडावर असताना वंचित बहुजन आघाडीला रामराम ठोकून भाजपमध्ये प्रवेश केलाय.

पांडे गुरुजींच्या भाजप प्रवेशाने पक्षाला फायदा होईल, तर वंचितला नक्कीच फटका बसेल, असं राजकीय जाणकार सांगत आहेत. दुसरीकडे गुरुजींना भाजपमध्ये प्रवेश करताच रिटर्न गिफ्टही मिळालं. भाजपाच्या अकोला जिल्हा उपाध्यक्षपदी त्यांची निवड करण्यात आली.

चंद्रशेखर पांडे गुरुजी यांची राजकीय कारकीर्द पाहता सलग तीन वेळा जिल्हा परिषद सदस्य म्हणून ते निवडून आले आहेत. तसंच शिवसेनेमध्ये असताना कोणतंही महत्त्वाचे पद न मिळाल्यामुळे त्यांनी वंचित बहुजन आघाडी मध्ये प्रवेश करून अकोला जिल्हा परिषद शिक्षण सभापती पद भूषवलं होतं.

मधल्या काळामध्ये ओबीसीचे आरक्षण रद्द झाल्यामुळे चंद्रशेखर पांडे गुरुजी यांचं पद संपुष्टात आलं होतं. त्यामुळे वंचित बहुजन आघाडीला सोडून आज अखेर त्यांनी भारतीय जनता पार्टीमध्ये जाहीर प्रवेश केला.