नाशिक बस अपघातातील अकोल्याच्या ५० वर्षीय व्यक्तीची प्राणज्योत मालवली; १४ दिवसांच्या उपचारानंतर सोडले प्राण

अकोला : नाशिक इथे ८ ऑक्टोबर रोजी झालेल्या खासगी बस आणि कंटेनरच्या भीषण अपघातात अकोला जिल्ह्यातील मासा गावातील साहेबराव जाधव (वय ५०) गंभीररीत्या जखमी झाले होते. त्यांच्यावर नाशिक येथील शासकीय वैद्यकीय महाविद्यालयाच्या रुग्णालयात उपचार सुरू होते. मात्र उपचाराला प्रतिसाद न दिल्याने २१ ऑक्टोबर रोजी रात्री त्यांचा मृत्यू झाला. आज शनिवारी मूळ गावी मासा इथे त्यांच्यावर अंत्यसंस्कार करण्यात येणार आहेत.

नाशिक येथील मिरची चौकात ८ ऑक्टोबर २०२२ रोजी पहाटे खासगी बस व कंटेनरच्या झालेल्या भीषण अपघातानंतर बसने पेट घेतला होता. त्यात जवळपास १२ जणांचा होरपळून मृत्यू, तर ३४ जण जखमी झाले होते. जखमींमध्ये अकोला तालुक्यातील मासा येथील साहेबराव जाधव (५०) यांचाही समावेश होता. त्यांच्यावर येथील शासकीय वैद्यकीय महाविद्यालयाच्या रुग्णालयात अतिदक्षता विभागात गेल्या १४ दिवसांपासून उपचार सुरू होते. मात्र उपचाराला प्रतिसाद न मिळाल्याने अखेर शुक्रवारी त्यांची प्राणज्योत मालवली.

ठाकरेंचं पुढचं टार्गेट ठरलं, शिंदे समर्थक भरत गोगावलेंच्या कट्टर विरोधक 'मातोश्री'वर

सदर घटनेची माहिती निवासी उपजिल्हाधिकारी प्रा.संजय खडसे यांना मासा ग्रामपंचायत सदस्य तथा मनसे उपजिल्हाप्रमुख सतीश फाले यांनी दिली. साहेबराव जाधव यांच्या पश्चात पत्नी, दोन मुले, एक मुलगी असा परिवार आहे. जाधव हे मजूर असून कुटुंबाच्या उदरनिर्वाहासाठी ते मुंबई इथे कामासाठी जात होते.