राज्यस्तरीय मास्टर्स अॅथलेटिक्स स्पर्धा-२०२२ चे अकोल्यात आयोजन

अकोला : महाराष्ट्र मास्टर्स अॅथलेटिक्स असोसिएशनच्या वतीने ०६ जानेवारी ते ०८ जानेवारी २०२२ ह्या कालावधीत डॉ. पंजाबराव देशमुख कृषी विद्यापीठाच्या मैदानावर राज्यस्तरीय आंतर जिल्हा मास्टर्स अॅथलेटिक्स स्पर्धेचे आयोजन करण्यात आले आहे. संपूर्ण महाराष्ट्रातून ३५ वर्ष ते साधारणत: ८५ वर्षांपर्यंतचे स्त्री/पुरूष स्पर्धक ह्या स्पर्धेतील २५ विविध क्रिडा शर्यतीतून आपले कसब पणाला लावणार आहेत.

महाराष्ट्रातून अंदाजे ५०० स्त्री/पुरुष स्पर्धकांचा सहभाग अपेक्षित आहे. या स्पर्धेसाठी कृषी विद्यापीठाचे क्रीडांगण सुसज्ज करण्यात येत असून स्पर्धेसाठी बाहेर गावावरून २५ पंचांना पाचारण करण्यात आले आहे. येणाऱ्या स्पर्धकांची निवास व भोजनाची चोख व्यवस्था करण्यात आली आहे. सध्याची कोविड-१९ सदृश परिस्थिती पाहता या अनुषंगाने शासनाच्या सर्व नियम व अटींचे अत्यंत चोखपणे पालन करण्यात येणार आहे. स्पर्धेच्या आयोजनाला अकोलेकर जनतेकडून सर्व प्रकारचे सहकार्य मिळत आहे.

या स्पर्धेच्या आयोजनाकरिता लुब्रिकंटस ऑईलची निर्मिती करणाऱ्या मॅक्सोविन इंडस्ट्रीज प्रा. लि. कंपनीकडून प्रायोजकत्व मिळाले असून संचालक अभिषेक शर्मा यांच्या माध्यमातून या स्पर्धेस सहकार्य मिळत आहे. या स्पर्धेतूनच महाराष्ट्राच्या संघाची निवड करण्यात येऊन संघ हैद्राबाद येथे दि.२१ ते २५ फेब्रुवारी २०२२ दरम्यान होणाऱ्या राष्ट्रीय स्पर्धेत सहभागी होईल.

या स्पर्धेला यशस्वी करण्यासाठी प्रकाश दाते, र॒घुविरसिंह ठाकूर, डॉ. राजेश चंद्रवंशी, नुतन चिने, रामचरण राठोड, गजानन सरदार, मिलिंद लांडे, दारासिंह ठाकूर, रविंद्र अभ्यंकर व समिती सदस्य काम करत आहेत.

वयाच्या पस्तीशीनंतर वयस्क संज्ञेत येणाऱ्या स्त्री/पुरुषांना स्वतःच्या स्वास्थाकडे गंभीरपणे पाहण्याचा दृष्टीकोन देणाऱ्या मास्टर्स अँथलेटीक फेडरेशन ऑफ इंडीया (माफी) या संघटनेची व्याप्ती दिवसेंदिवस वाढत असून समाजात स्वास्थ्याविषयी सकारात्मकता आणण्यात संस्थेची वाटचाल निश्‍चितच शुभ संकेत देणारी ठरली आहे.

मास्टर्स अॅथलेटिक्स फेडरेशन ऑफ इंडिया ही भारतातील एकमेव संस्था आहे, जी वर्ल्ड मास्टर्स अॅथलेटिक्सशी संलग्न असून भारतातील सर्व राज्य संघटना संस्थेची संलग्न आहेत.