अमरावती: मराठा कार्यकर्त्याचा आत्मदहनाचा प्रयत्न

अमरावती:

मराठा समाज आरक्षणासाठी राज्यात मोर्चे, आंदोलने; तसंच काही आंदोलकांनी आत्महत्येचा प्रयत्नही केला असताना, अमरावती जिल्हाधिकारी कार्यालय परिसरात आज एका मराठा समाजातील कार्यकर्त्यानं आत्मदहनाचा प्रयत्न केला. सकल मराठा समाजाच्या बैठकीच्या काही तासाआधीच हा प्रकार घडल्यानं मोठी खळबळ उडाली.

संजय महादेवराव कदम (वय ४०, वडाळी, अमरावती) असं या मराठा कार्यकर्त्याचं नाव आहे. आज, गुरुवारी दुपारी तीनच्या सुमारास रॉकेलची बाटली हातात घेऊन तो कार्यालय परिसरात पोहोचला. दुपारची वेळ असल्यानं कार्यालय आणि परिसरात वर्दळ नव्हती. त्यानं रॉकेल अंगावर ओतून घेतलं. त्याचवेळी तेथील पार्किंगची व्यवस्था पाहणारा कर्मचारी प्रमोद माहुरकर याने कदमचा आत्मदहनाचा प्रयत्न हाणून पाडला. जिल्हाधिकाऱ्यांच्या दालनासमोर तैनात पोलिसांनी कदमला पकडलं. गाडगेनगर पोलिसांनी घटनास्थळी धाव घेत त्याला ताब्यात घेतलं.