फ्रान्सची युवती झाली अमरावतीची सून

म. टा. प्रतिनिधी, अमरावती

प्रेमाला वय, धर्म आणि देशांच्या सीमा नसतात, असं म्हणतात. सोशल मीडियाच्या वाढत्या प्रभावामुळे तर या सीमांची सारीच बंधनं तुटून पडली आहेत. सोशल मीडियाच्या अतिवापराबाबत तज्ज्ञांकडून चिंता व्यक्त होत असली तरी काही वेळा हाच सोशल मीडिया अनेकांची आयुष्यच बदलवून टाकतो. अमरावतीतल्या एका सामान्य कुटुंबातील तरुणाचे आयुष्यही सोशल मीडियाने बदलवून टाकले आहे.

गौरव सुभाष पारिसे असे या तरुणाचे नाव असून फेसबुकवरुन फ्रान्समधील तरुणीशी झालेल्या मैत्रीचे रूपांतर त्यांच्या विवाहात झाले आहे.

स्थानीक कठोरा मार्गावरील शिवनगर येथे राहणारा गौरव सुभाष पारिसे हा तरूण पुणे येथे अॅनीमेशन कंपनीमध्ये कार्यरत आहेत. सप्टेंबर २०१५मध्ये कंपनीच्या सहलीसाठी गौरव दिल्ली येथे गेला होता. तिथे इंडीया गेट परिसरात फिरत असताना त्यांची भेट फ्रान्समधील पेरॉडॉन चॅबलोस येथे राहणाऱ्या ओफेलो रोबेरो (29) या तरूणीबरोबर झाली. ओफेलो फ्रान्समधून तिच्या मित्रांसोबत दिल्ली येथे आली होती. तोंडओळख झाल्यानंतर गौरव आणि ओफेला यांनी सोबत छायाचित्रदेखल काढले. दिल्लीतून परतल्यानंतर गौरवने ओफेलो हीला फेसबुकवरून फ्रेंड रिक्वेस्ट पाठविली. ओफेलोने देखील गौरवला उत्स्फूर्त प्रतिसाद मैत्रीचा स्वीकार केला आणि दोघांच्या संवादाला सुरुवात झाली. हळूहळू या संवादाचे काही रूपांतर प्रेमात झाले. अखेर एकमेकांबरोबर राहण्याशिवाय पर्याय नसल्याचे लक्षात आल्यानंत गौरव आणि ओफेलोने विवाहाचा निर्णय घेतला.

दोघांचा निर्णय पक्का झाल्यानंतर गौरवने विवाहाबाबत घरच्यांना कळवले. त्याच्या कुटुंबियांनीदेखील हा प्रस्ताव मान्य केला. तिकडे फ्रान्समध्येसुद्धा ओफेलोने तिच्या कुटुंबियांकडून गौरवबाबत संमती मिळवली. दोन महिन्यापूर्वी ओफेलो पुणे येथे आली. गौरव व ओफेलो यांचा मराठी पद्धतीने साखरपुडा झाला. यानंतर सोमवारी दोघे नोंदणी पद्धतीने विवाहबद्ध झाले. हिंदू पद्धतीने हा विवाह संस्कार पार पडल्यानंतर लवकरच दोघे आता ख्रिश्चन पद्धतीने फ्रान्स येथे विवाह करणार आहेत. ओफेलो ही फ्रान्स येथे नोकरी करीत असून ती पदवीधर आहे. तिचे वडील एका मोठ्या कंपनीत कार्यरत आहेत.