प्रा. अनिलकुमार सौमित्र यांच्याविरोधात काँग्रेस आक्रमक, कारण...

अमरावती: महात्मा गांधी यांना 'पाकिस्तानचे राष्ट्रपिता' म्हणणारे प्रा. अनिलकुमार सौमित्र यांच्या अमरावती येथील इंडियन इन्स्टिट्यूट ऑफ मास कम्युनिकेशन (IIMC) मध्ये झालेल्या नियुक्तीविरोधात काँग्रेसनं आक्रमक भूमिका घेतली आहे. अनिलकुमार यांच्या नियुक्तीचा निषेध म्हणून काँग्रेस व एनएसयूआयच्या कार्यकर्त्यांनी आज आयआयएमसी केंद्रात जोरदार आंदोलन केलं.

अनिलकुमार हे मध्य प्रदेश भाजपमध्ये सक्रिय होते. मध्य प्रदेश भाजपच्या मीडिया सेलचे ते प्रमुख होते. महात्मा गांधी हे 'पाकिस्तानचे राष्ट्रपिता' असल्याचं वक्तव्य त्यांनी केलं होतं. या वक्तव्याप्रकरणी त्यांची भाजपमधून हकालपट्टी करण्यात आली होती. गेल्याच महिन्यात त्यांची दिल्लीतील आयआयएमसीमध्ये नियुक्ती करण्यात आली होती. भारतीय भाषातील पत्रकारिता शिकवण्याची जबाबदारी त्यांच्यावर होती. नुकतंच त्यांना अमरावती येथील आयआयएमसीमध्ये बदली करण्यात आली आहे. अमरावती काँग्रेसनं या नियुक्तीचा निषेध केला आहे. त्याविरोधात आज निदर्शनंही करण्यात आली.

वाचा: ही बातमी आली कुठून?; 'त्या' प्रश्नावर थोरातांचा प्रतिप्रश्न

आश्चर्याची बाब म्हणजे, अनिलकुमार यांची ज्या अमरावती केंद्रात बदली करण्यात आली आहे, तिथं पत्रकारितेचे मराठी व इंग्रजी या दोनच भाषांतील अभ्यासक्रम आहेत. त्यांना यापैकी कुठल्याही भाषेतील अध्यापनाचा अनुभव नाही.

वाचा: मोठी बातमी! 'या' वेळेत मुंबई लोकल ट्रेन सर्वांसाठी सुरू होणार

सूत्रांनी दिलेल्या माहितीनुसार, अमरावती व जम्मू केंद्रात पुढील वर्षापासून हिंदी पत्रकारिता अभ्यासक्रम सुरू केला जाणार आहे. त्याच तयारीचा भाग म्हणून अनिलकुमार यांची अमरावती तर, राकेश गोस्वामी यांना जम्मू केंद्रात नियुक्ती करण्यात आली आहे. सध्या ते अमरावतीहून दिल्लीतील विद्यार्थ्यांचे हिंदी पत्रकारितेचे वर्ग घेणार असल्याचे सांगितले जाते.

पीएमसी घोटाळा: शिवसेनेचा आणखी एक नेता ईडीच्या रडारवर