म.टा. प्रतिनिधी, अमरावती
नवजात बालकांना अत्यावश्यक असणारे मातेचे दूध अनेकदा अडचणींमुळे उपलब्ध होवू शकत नाही. यामुळे काही घटनांमध्ये बालके दगावतात. यासाठी रोटरी क्लब व काही संघटनांनी संयुक्तपणे मातेच्या दुधाची पेढी निर्माण केली आहे. पेढीद्वारे गरजवंत नवजातांना मातेचे दूध नि:शुल्क पुरविले जाणार आहे.
नवजातांसाठी मातेचे दूध अमृत मानले जात असून त्यात प्रोटिन्स, कार्बोहायड्रेटस, फॅट, मिनरवल्स, विटामिन्स, प्रतिकार शक्तीचे घटक योग्य प्रमाणात असतात. परंतु नुकतीच प्रसूती झालेली माता आजारी असल्यास बालकाला तिचे दूध मिळू शकत नाही. मातेच्या दुधाशी जुळणारे कृत्रीम दूध देखील बाजारात उपलब्ध नाही. यासाठीच मातेच्या दुधाची पेढीची स्थापना करण्यात आली आहे. यासाठी रोटरी क्लब ऑफ अमरावती मिडटाऊन व रोटरी क्लब ऑफ ग्वॉटीयर यांनी पुढाकार घेतला आहे.
रोटरीचे अध्यक्ष डॉ. बबन बेलसरे, डॉ. राजेश बूब यांनी सांगितले, अनेक बालकांना आईचे दूध मिळत नाही त्यामुळे ते आजारी होवून त्यांची प्रकृती खालावते. यासाठी हा उपक्रम आहे. बाळाला दूध न मिळाल्यास त्याला मेंदूज्वर, न्युमोनिया, रक्तात पसरलेला जंतूदोष, आतडी सडणे आदी रोग होवू शकतात. बालकांना अशा आजारांनी ग्रासू नये यासाठी ही पेढी कार्यरत राहणार आहे.
पंचवटी चौक येथील डॉ. पंजाबराव देशमुख वैद्यकीय महाविद्यालय व रूग्णालयात ही दूध पेढी राहणार आहे. पीडीएमसीमध्ये दूध संकलन केंद्रात तीनशे लीटर दूध साठविले जाईल. साठविलेले दूध किमान तीन महिनेपर्यत टिकणार आहे. दूध दान करणाऱ्या मातेच्या आरोग्याची तपासणी करण्यात येवून ती निरोगी असेल तरच तिचे दूध स्वीकारले जाईल. दानदात्या मातेचे दूध अत्याधुनिक यंत्राद्वारे काढले जाईल. मातांना यात कुठलाही त्रास होणार नाही. रक्तदानापेक्षा सुद्धा ही सोपी पद्धत असल्याचे डॉ. बेलसरे यांनी यावेळी सांगितले. अमरावती येथील मातेच्या दुधाची पेढी ही मध्य भारतातील पहिला प्रयोग आहे. यापूर्वी मुंबई येथील सायन हॉस्पीटलमध्ये डॉ. अरमेडा फर्नांडीस यांनी २६ वर्षांपूर्वी अशाप्रकारची पेढी तयार केली होती. त्याचे उत्तम परिणाम दिसू लागले. अमरावती येथील पेढीच्या निर्मितीसाठी डॉ. राजेश बूब व सुभाष यादव प्रयत्न करीत आहेत.