जुन्या वैमनस्यातून गोळीबार, एक ठार

म. टा. वृत्तसेवा, अमरावती

स्‍थानिक हबीब नगर परिसरातील दोन गटांत सुरू असलेल्या वादाचे पर्यावसान शनिवारी रात्री गोळीबारात झाले. या गोळीबारात एका युवकाचा मृत्यू झाला तर चौधे जखमी झाले.

अन्सार शाह जमाल शाह (२८, हबीबनगर) असे गोळीबारात मृत्युमुखी पडलेल्या युवकाचे नाव असून राजीक शाह युसूफ शाह (३५), शाहीर शाह बशीर शाह (३२), शेख अयुब शेख बाबा (४०), नवशाद शाह मुश्ताक शाह (३४) अशी जखमींची नावे आहेत. शनिवारी रात्री साडे अकराच्या सुमारास घडली.

सूत्रांनी दिलेल्या माहितीनुसार, गेल्या अनेक दिवसापासून हबीब नगरमधील दोन गटांमध्ये वाद सुरु होता. मृतक अन्सार शाह जमाल शहा जुन्या वादाचा समझौता करण्यासाठी या प्रकरणातील आरोपी शेख मन्नान याच्याकडे गेले होते. यावेळी दोन्ही गटांमध्ये वादावादी झाली. यादरम्यान शेख सलमान शेख मन्नान, शेख गोलू शेख मन्नान, शेख इस्माईल, शेख वसीम व अन्य दोघांनी त्यांच्यावर चाकूने हल्ला केला. यावेळी आरोपींपैकी शेख सलमान शेख मन्नान याने त्याच्याजवळील पांढऱ्या रंगाच्या छोटी बंदुकीतून अन्सार शाह जमाल शहा याच्यावर तीन गोळ्या झाडल्या. यात अन्सार शहा याचा घटनास्थळीच मृत्यू झाला. हल्ल्यानंतर आरोपी पसार झाले. घटनेची माहिती मिळताच घटनास्थळी पोहोचून गाडगेनगर पोलिसांनी आरोपींना अटक केली.