नातेवाइकांसाठी प्रतिष्ठा पणाला

म. टा. वृत्तसेवा, अमरावती

महापालिकेच्या निवडणूक रिंगणात मुख्यमंत्री देवेंद्र फडणवीस, माजी राष्ट्रपती प्रतिभाताई पाटील, काँग्रेसचे माजी प्रदेशाध्यक्ष माणिकराव ठाकरे यांचे नातेवाइक लढत देत आहेत. त्यामुळे केवळ उमेदवारच नव्हे तर या दिग्गजांकरिता ही लढत प्रतिष्ठेची झाली आहे. निवडणुकीतील रंगत वाढली आहे.

मुख्यमंत्री देवेंद्र फडणवीस यांचे मामेभाऊ व भाजयुमोचे पदाधिकारी विवेक कलोती बुधवारा जवाहरगेट प्रभागातून भाजपचे उमेदवार आहेत. पाच वर्षांपूर्वीदेखील त्यांनी या प्रभागातून निवडणूक लढविली होती. परंतु त्यांना अपयश आले होते. यावेळी भाजपला ‘अच्छे दिन’ आहेत. भाजपकडे उमेदवारांसाठी मोठी मागणी झाली. यामुळे ही संधी साधत विवेक कलोती यांनी दंड थोपटले आहेत. कलोती यांच्या विरोधात पाच उमेदवार आहेत. कलोती यांना शिवसेनेचे नगरसेवक आणि मनपातील विरोधी पक्षनेते प्रवीण हरमकर यांचे कडवे आव्हान आहे. कलोती यांच्या विजयासाठी भाजपने व्यूहरचना आखली आहे. कलोतींचा जय-पराजय भाजपच्या स्थानिक पदाधिकाऱ्यांसाठीदेखील प्रतिष्ठेचा झाला आहे. विवेक कलोतींच्या लढतीवर मुख्यमंत्र्यांचेही लक्ष लागले आहे.

माजी राष्ट्रपती प्रतिभाताई पाटील यांचे पुतणे व माजी आमदार रावसाहेब शेखावत यांचे चुलत भाऊ बबलू शेखावतदेखील निवडणूक रिंगणात आहेत. शेखावत यांनी तीन निवडणुका यशस्वीरित्या लढविल्या आहेत. विविध प्रभागातून ते निवडून आले आहेत. यावेळी शेखावत प्रभाग क्रमांक १८ जोग स्टेडियम येथून सर्वसाधारण गटातून काँग्रेसचे उमेदवार आहेत. या प्रभागात १२ उमेदवार असून शेखावतांच्या विरोधात विद्यमान नगरसेवक अंबादास जावरे आहेत. जावरे गेल्या दोन निवडणुका बहुमतांनी जिंकले आहेत. याशिवाय काँग्रेसच्या माजी नगरसेविकेचा पुत्र कामराज अहमद अन्सारी यांचेही शेखावतांना आव्हान आहे. विजयासाठी या तिघांमध्ये चुरस रंगणार आहे. दलित, मुस्लिमबहुल भागातील मतदारांवर यांचा डोळा आहे. याशिवाय भाजपनेदेखील प्रकाश सोनोने यांना उमेदवारी दिली आहे. यामुळे मतांचे मोठ्या प्रमाणात विभाजन होणार आहे. बबलू शेखावत यांच्या मतांना खिंडार पाडण्यासाठीदेखील भाजप, बसपने तयारी चालविली आहे.

काँग्रेसचे माजी प्रदेशाध्यक्ष माणिकराव ठाकरे यांचे भाचे अमोल ठाकरे हेदेखील निवडणुकीच्या आखाड्यात आहेत. काँग्रेसने त्यांना राजापेठ प्रभाग क्रमांक १८मधून उमेदवारी दिली आहे. त्यांच्या विरोधात काँग्रेसचे विद्यमान व सध्या आमदार रवी राणा यांच्या युवा स्वाभिमानीचे उमेदवार राजेंद्र महल्ले यांचे तगडे आव्हान आहे.

अमोल ठाकरे यांच्याकरिता महल्लेंना उमेदवारी नाकारली. ठाकरे गेल्यावेळी काँग्रेसचे स्वीकृत नगरसेवक होते. ठाकरे यांच्या विरोधात राजेंद्र महल्ले, अपक्ष मुन्ना राठोड यांच्यासह पाच उमेदवारांचे आव्हान आहे.