आमदार रवी राणांविरोधात अॅट्रोसिटीचा गुन्हा

अमरावती:

सिटी बँक घोटाळ्यावरून सोशल मीडियामध्ये बदनामी केल्याप्रकरणी शिवसेनेचे खासदार आनंदराव अडसूळ यांनी अपक्ष आमदार रवी राणा यांच्यासह चारजणांविरोधात अॅट्रोसिटीचा गुन्हा दाखल केला आहे. राणा यांच्याविरोधात अडसूळ यांनी आठवडाभरात केलेली ही दुसरी तक्रार आहे.

आनंदराव अडसूळ यांनी रवी राणा आणि त्यांचे बंधू सुनील राणा यांच्यासह चारजणांविरोधात गाडगेनगर पोलीस ठाण्यात अॅट्रोसिटीचा गुन्हा दाखल केला आहे. आठवडाभरातच राणांविरोधात दुसऱ्यांदा हा गुन्हा दाखल करण्यात आला असून त्यांच्यावर सोशल मीडियातून बदनामी केल्याचा आरोप ठेवण्यात आला आहे. यावेळी अडसूळ यांनी आधीच्या तक्रारीवर काय कारवाई करण्यात आली? असा सवालही पोलिसांना केला. दरम्यान, काही दिवसांपूर्वी शिवसेना पदाधिकाऱ्यांच्या शिष्टमंडळाने पोलिस आयुक्त दत्तात्रेय मंडलिक यांची भेट घेत राणांवर कारवाई करण्याची मागणी केली होती. त्यानंतर पुन्हा आणखी एक तक्रार दाखल करण्यात आल्याने आगामी काळात अमरावतीचं राजकारण तापण्याची चिन्हे आहेत.