राज्यात राबविणार ‘आवळगाव पॅटर्न’

म. टा. प्रतिनिधी, यवतमाळ

मारेगाव तालुक्यातील आदिवासीबहुल आवळगाव परिसरात कापसाची लागवड केली जाते. कापसाच्या बीटी वाणांचा वापर, अनिश्चित पाऊसमान, कोरडवाहू क्षेत्र, सुमार आर्थिक परिस्थिती व कृषी निविष्ठाकरिता बाजारावरील अवलंबित्व या कारणामुळे उत्पादन खर्चात भरमसाठ वाढ होत असल्याचे दिसून येते. उत्पादकता कमी असल्यामुळे निव्व्वळ नफा कमी होत आहे. परिणामी मागास आदिम जमातीतील शेतकऱ्यांची आर्थिक परिस्थिती खालावत आहे. त्यासाठी स्वावलंबी व पारंपारिक शेतीचा आवळगाव पॅटर्न राज्यभर राबविण्याची घोषणा वसंतराव नाईक शेती स्वावलंबन मिशनचे अध्यक्ष किशोर तिवारी यांनी केली आहे.

आवळगाव येथे देशी वाणाचे बियाणे वाटप कार्यक्रम १८ जून रोजी पार पडला. यावेळी ते बोलत होते. महाबीजकडे देशी बिगर बीटी कापसाच्या बिजोत्पादनासाठी नोंदणी करण्यात येणार आहे. उत्पादित बियाणे बाजारभावापेक्षा ४००रुपये अधिक दराने शेतकऱ्यांकडून घेणार असल्याचे महाबीजचे व्यवस्थापक देशमुख यांनी सांगितले. सदर कार्यक्रमांतर्गत वाटप केलेल्या चार क्विंटल बियाण्यांपासून ४०० क्विंटल बियाणे उत्पादित करण्याचा संकल्प राज्यात प्रथमच या भागातील आदिवासी शेतकऱ्यांनी केला आहे. प्रास्ताविक पांढरकवडाचे उपविभागीय कृषी अधिकारी राहुल सातपुते तर संचालन मारेगावचे तालुका कृषी अधिकारी राकेश दासरवार यांनी केले.