अमरावती पालिका स्थायी समिती सभापतीपदी कलोती

अमरावती: अमरावती महापालिकेच्या स्थायी समिती सभापतीपदी भाजपचे विवेक कलोती यांची बिनविरोध निवड झाली. कलोती हे मुख्यमंत्री देवेंद्र फडणवीस यांचे मामे भाऊ असून फडणवीस यांच्या आशीर्वादानेच त्यांना थेट स्थायी समितीचं सभापतीपद मिळाल्याची चर्चा आहे.

अमरावती महापालिका स्थायी समितीचे विद्यमान सभापती तुषार भारतीय यांचा कार्यकाळ गुरुवारी संपला. त्यामुळे स्थायी समिती सभापतीपदासाठी आज निवडणूक घेण्यात आली. सभापतीपदासाठी भाजपकडून विवेक कलोती यांनी तर काँग्रेसकडून सपना ठाकूर यांनी उमेदवारी अर्ज दाखल केला होता. परंतु सपना ठाकूर यांनी उमेदवारी अर्ज मागे घेतल्याने कलोती यांची बिनविरोध निवड करण्यात आली. निवडणूक निर्णय अधिकारी म्हणून जिल्हाधिकारी अभिजित बांगर यांनी काम पाहिले. अमरावती महापालिकेच्या १६ सदस्यीय स्थायी समितीत भाजपचे ९, काँग्रेस आणि बसपचे प्रत्येकी एक, शिवसेनेचे ३ आणि एमआयएमचे २ सदस्य आहेत.

मागच्यावेळीच कलोती हे स्थायी समिती सभापतीपदी इच्छूक होते. मात्र त्यांच्यावर मात करत सभापतीपदाची उमेदवारी मिळविण्यात तुषार भारतीय यांना यश आलं होतं. यावेळी मात्र सभापतीपद मिळविण्यासाठी त्यांनी थेट फडणवीसांचाच आधार घेतल्याचं बोललं जातं.