ताडोबात शैक्षणिक सहलीला सुरुवात

म. टा. वृत्तसेवा, चंद्रपूर

देश, विदेशातील पर्यटकांना मोहित करणाऱ्या ताडोबा व्याघ्र प्रकल्पातील वनसंपदेची माहिती स्थानिक विद्यार्थ्यांना व्हावी. जल, जंगल, जमिन व वन्यजीव याबद्दलची आत्मियता व अभिमान वाढवा, यासाठी सुरु करण्यात आलेल्या ‘चला माझ्या ताडोबाला’ या उपक्रमाला गेल्या वर्षी उत्तम प्रतिसाद मिळाल्यानंतर यंदाही तो सुरू ठेवण्यात येणार आहे.

ताडोबा व्याघ्र प्रकल्पाची शालेय विद्यार्थ्यांना ओळख व्हावी व पर्यटनवाढीला फायदा व्हावा या हेतूने पालकमंत्री सुधीर मुनगंटीवार यांनी मागील शैक्षणिक सत्रात ‘चला माझ्या ताडोबाला’ हा उपक्रम सुरू केला. या उपक्रमाअंतर्गत चंद्रपूर जिल्हयातील जिल्हा परिषद, पंचायत समिती, नगरपरिषद, आश्रम शाळा, दिव्यांग शाळांमधील सुमारे ४० विद्यार्थ्यांना ताडोबाची सहल घडविण्यात येते. शाळेपासून व्याघ्र प्रकल्पांपर्यंतच्या वाहतुकीची व्यवस्‍था ताडोबा अंधारी व्याघ्र प्रतिष्ठानतर्फे केली जाते. विद्यार्थ्यांसोबत शाळेतील निवडक शिक्षकांनाही प्रकल्पात प्रवेश देण्यात येतो.

गेल्यावर्षी या मोहिमेला जिल्ह्यातील सर्वच शाळांनी भरपूर प्रतिसाद दिला होता. या वर्षीदेखील या शैक्षणिक सहलीला सुरवात झाली आहे. वाघ, बिबट, अस्वल, हरीण, सांबार, चौशिंगा अशा वन्यजीवांनी ताडोबा व्याप्त असून विद्यार्थ्यांसाठी ही मोफत सहल मेजवाणी ठरते. अशा प्रकारची योजना राबविणारा ताडोबा अंधारी हा भारतातील एकमेव व्याघ्र प्रकल आहे, हे विशेष.