लाचखोर पोलिस उपनिरीक्षकांना शिक्षा

चंद्रपूर : कर्तव्यावर असताना नागरिकांना पैशांची मागणी करणाऱ्या दोन पोलिस उपनिरीक्षकांना दोन वेगवेगळ्या प्रकरणांमध्ये लाचलुचपत प्रतिबंधक कायद्याच्या विशेष न्यायालयाचे विशेष न्यायाधीश के. एल. व्यास यांनी कारावासाची शिक्षा सुनावली आहे. लिंबाजी शेळके आणि दादाराव मात्रे अशी आरोपी पोलिस उपनिरीक्षकांची नावे आहेत.

उपपोलिस स्टेशन लाठी जि. चंद्रपूर येथे तैनात असताना शेळके यांनी जुना पोडसा येथील एका नागरिकाला दोन हजार रुपयांची मागणी केली होती. या प्रकरणी १० एप्रिल २००३ रोजी सापळा रचून शेळके यांना लाच घेताना अटक करण्यात आली होती. याप्रकरणी शेळके यांना न्यायालयाने कलम ७ अंतर्गत २ वर्षांची शिक्षा व १० हजार रूपये दंड, दंड न भरल्यास ४ महिने सश्रम कारावास तसेच कलम १३ (१) (ड) सह १३ (२) अंतर्गत तीन वर्ष शिक्षा १२,००० रु. दंड, दंड न भरल्यास ५ महिने सश्रम कारावासाची शिक्षा सुनावली. तर एका ड्रायव्हरविरोधात गुन्हा दाखल न करण्यासाठी मात्रे यांनी दोन हजार रुपयांची मागणी केली होती. संबंधित ड्रायव्हरने लाचलुचपत विभागाकडे तक्रार केल्यानंतर २१ जुलै २००० रोजी मात्रे यांना अटक करण्यात आली होती. याप्रकरणी मात्रे यांना न्यायालयाने कलम ७ अंतर्गत ३ वर्षांची शिक्षा व २० हजार रुपये दंड, न भरल्यास ६ महिने सश्रम कारावास तसेच कलम १३ (१) (ड) सह १३ (२) अंतर्गत तीन वर्षांची शिक्षा व दंड न भरल्यास ४ महिने सश्रम कारावासाची शिक्षा सुनावली.