अभिमानास्पद! वडील रंगकाम तर आई शिवणकाम करताय; पण लेकीनं करुन दाखवलं...

अमरावती : वडील रंगकाम तर आई शिवणकाम करून संसाराचा गाडा हाकत असतानाच तिने यूपीएससीचे स्वप्न पाहिले. उच्च शिक्षण घेऊन परीक्षेची तयारी केली. ध्येयपूर्तीसाठी लाख रुपयाची नोकरीही सोडली. शेवटी यश मिळाले. ती यूपीएससीची परीक्षा उत्तीर्ण झाली. अमरावतीच्या बिच्छू टेकडीजवळील विटाभट्टी परिसरातील पल्लवी चिंचखेडेची ही संघर्षकथा.

पल्लवीचे वडील सुखदेव हे रंगकामाचा व्यवसाय करतात. आई शिवणकाम करून संसाराला आर्थिक हातभार लावते. घरची परिस्थिती बेताची असतानादेखील आपल्या मुलींनी उच्चशिक्षण घ्यावे, अशी या आईवडिलांची इच्छा. सुखदेव यांनी अधिकची कामे करून पल्लविला अभियांत्रिकीचे शिक्षण दिले. तिच्या बहिणीला स्पर्धा परीक्षेच्या तयारीसाठी प्रोत्साहन दिले. मुलींनीही वडिलांच्या अपेक्षा पूर्ण करीत नोकऱ्या मिळविल्या. पल्लवीला एका मोठ्या कंपनीत एक लाख रुपये वेतनाची नोकरी मिळाली. लहान बहीण बँकेत रूजू झाली. कष्टाचे दिवस संपले होते. पण, मनात केंद्रीय लोकसेवा आयोगाची परीक्षा देण्याची इच्छा स्वस्थ बसू देत नव्हती. पल्लवीने अभ्यासाला सुरुवात केली. दिल्लीला जावून तयारी करावी लागणार असल्याने लाख रुपयाची नोकरी सोडून दिली. अपार कष्टाच्या जोरावर तिने यशही मिळविले. पल्लवी यूपीएससी उत्तीर्ण झाल्याची वार्ता मंगळवारी समजताच अमरावतीकरांनी तिच्या कुटुंबाचे अभिनंदन केले.

तुकाराम मुंढेचे भाषण ‘टर्निंग पॉइंट’

अमरावतीच्या आनंद शाळेतून शिक्षण झाले. पदवी पूर्ण करीत असताना काही तरी वेगळे, मोठे करावे असे स्वप्न पाहिले. याच काळात प्रशासकीय अधिकारी तुकाराम मुंढे यांचे भाषण ऐकण्याची संधी मिळाली. याच भाषणातून प्रेरणा घेऊन केंद्रीय लोकसेवा आयोगाची परीक्षा देऊन अधिकारी बनण्याचे ठरविले. स्वप्न प्रत्यक्षात आणण्यासाठी परीश्रम घेतले आणि यशही मिळाले,’ असे पल्लवीने ‘मटा’शी बोलताना सांगितले.