बोगस ‘समाज कल्याण’चे आठ बँक खाती गोठविली

म. टा. प्रतिनिधी, अमरावती

बोगस समाजकल्याण विभागाच्या नावावर मार्डी मार्गावर कार्यालय थाटून अनेकांना गंडविणाऱ्या चौघांना पोलिसांनी अटक केली. संबंधितांची आठ बँक खाती गोठविली असून १ लाख १० हजार रुपये जप्त करण्यात आले आहेत.

सार्वजनिक कल्याण विभाग या बनावट संस्थेद्वारे जाहिरात देऊन नोकर भरतीची प्रक्रिया सुरू केल्याचा प्रकार गुरुवारी उघड झाला होता. सामाजिक न्याय सहाय्यता विभागाच्या सहाय्यक आयुक्त प्राजक्ता इंगळे व पोलिसांच्या संयुक्त पथकाने या बनावट कार्यालयावर धाड टाकून हा प्रकार उघडकीस आणला होता. यानंतर शुक्रवारी तोतयागिरी करणाऱ्या कार्यालयातील दीपेंद्र टावरी, सुमित गोडाम, अमोल दाभाडे, व नागपूर येथील गीता गडबडे अशा चौघांना अटक करण्यात आली. त्यांच्याजवळून रक्कम जप्त करण्यात आली. याशिवाय विविध बँकांचे धनादेश पोलिसांनी जप्त केले. आरोपींपैकी अमोल दाभाडे हा व्यवस्थापक म्हणून तर सुमित गेडाम व दीपेंद्र टावरी त्यांचे सहकारी म्हणून कार्यरत होते. प्राजक्ता इंगळे यांच्या तक्रारीवरून संबंधितांवर फसवणुकीचा गुन्हा दाखल करण्यात आला. यानंतर दीपेंद्र टावरी याच्या आठ बँक खात्यांना गोठविण्यात आले. ही सर्व बँक खाती उत्तर प्रदेशातील असल्याचे अधिकाऱ्यांनी सांगितले. बनावट समाज कल्याण कार्यालयाचा मुख्य सूत्रधार उतर प्रदेशच्या वाराणासी येथील संजय यादव पांडे व सोनभद्र येथील मनोज शहा असल्याचे तपासात पुढे आले आहे. आरोपींना ताब्यात घेण्यास लवकरच पोलिस पथक रवाना करण्यात येणार आहे.