दिवाळीच्या पूजेपूर्वीच मायलेकींना अखेरचा निरोप; अभियंता मुलीसोबत आईने संपविली जीवनयात्रा

अमरावती : शहरातील संमती शिक्षक कॉलनीतील घरात अभियंता मुलीसह शिक्षिका असलेल्या आईचा मृतदेह गळफास घेतलेल्या अवस्थेत आढळून आल्याने खळबळ उडाली. ही घटना मंगळवारी रात्री अकराच्या सुमारास उघडकीस आली. पोलिसांच्या प्राथमिक तपासात ही आत्महत्या असल्याचे स्पष्ट झाले आहे. सुवर्णा प्रदीप वानखडे ( वय ५१) आणि मृणाल प्रदीप वानखडे (वय २५) असे मृतक आई व मुलीचे नाव आहे.

काय घडलं नेमकं?

प्रदीप वानखडे हे शिक्षक असून यवतमाळ जिल्ह्यातील घाटंजी येथे एका शाळेत कार्यरत आहेत. ते घाटंजीला राहतात तर अमरावतीला मुलगी मृणाल व पत्नी सुवर्णा या दोघीच राहत होत्या. सहा महिन्यांपूर्वीच मृणाल पुण्यातील एका सॉफ्टवेअर कंपनीत अभियंता म्हणून नोकरीवर लागली होती. तर सुवर्णा शहरातील एका खासगी शाळेत नोकरीवर असल्याची माहिती आहे. शिक्षक संमती कॉलनीपासून जवळच असलेल्या हनुमान मंदिराजवळ मंगळवारी सायंकाळी एकाला सोन्याचे दागिने व काही रोकड पडल्याचे दिसले. त्यांनी ही माहिती गाडगेनगर पोलिसांना दिली. पोलिसांनी घटनास्थळी येऊन रक्कम व दागिने ताब्यात घेतले. पाहणीत त्यात सोन्याच्या दागिन्यांची काही बिले आढळली. त्यामध्ये यवतमाळ येथील एक व एक बिल शहरातील विवेकानंद कॉलनीत राहणाऱ्या डॉ. आखरे यांच्या नावाचे होते. पोलिसांनी विवेकानंद कॉलनीतील आखरे यांना ही माहिती दिली. सदर दागिने पाहिल्यानंतर ते दागिने सुवर्णा वानखडे यांचे असल्याचे आखरे यांनी ओळखले. आखरे हे सुवर्णा वानखडे यांचे भाऊ आहेत. हनुमान मंदिराजवळ सुमारे दीडशे ग्रॅम सोन्याचे दागिने व पावणे दोन लाख रुपये रोख होती. संशय वाढल्यामुळे पोलिस व डॉ. आखरे हे वानखडे यांच्या घरी पोहोचले. पोलिसांनी वानखडे यांच्या घराबाहेरून बरेच आवाज दिले मात्र प्रतिसाद येत नव्हता. त्यामुळे पोलिसांनी नातेवाइकांच्या उपस्थितीत दरवाजा तोडला आणि घरात प्रवेश केला. घरातील हॉलमध्ये सुवर्णा आणि मृणाल यांचे मृतदेह दोन पंख्याला लटकलेले दिसून आले. घटनेची माहिती मिळताच पोलिस उपायुक्त विक्रम साळी, एसीपी दत्तात्रय ढोले, गाडगेनगरचे ठाणेदार आसाराम चोरमले, पीएसआय पंकज ढोके यांच्यासह पोलिस ताफा घटनास्थळी दाखल झाला. नागरिकांची गर्दीही जमली होती.

दिवाळीच्या पूजेपूर्वीच घडली घटना

घटना दिवाळीच्या दिवशीच घडल्याचा पोलिसांचा अंदाज आहे. घरात एका ठिकाणी पोलिसांना चिठ्ठी आढळली. त्या चिठ्ठीत इंग्रजीत लिहिले आहे की, धन्यवाद आम्हाला जगाने प्रेम दिले, तसेच मराठीत लिहिले आहे की, आमचा अंतिम संस्कार आखरे परिवार करणार. दरम्यान ही चिठ्ठी नेमकी कोणी लिहिली, याबाबत पोलिस तपास करत आहेत. घरात पूजेचे साहित्य व फुल तसेच पडून होते. पूजेची तयारीही दिसली. पूजेपूर्वीच ही घटना घडल्याचे सांगण्यात येत आहे. मायलेकींवर अंत्यसंस्कार करण्यात आले.

प्रदीप वानखडेला अटक

डॉ. आखरे यांच्या तक्रारीवरून पोलिसांनी प्रदीप वानखडे यांच्यावर आत्महत्येस प्रवृत्त करणे व कौटुंबिक छळ असे दोन गुन्हे दाखल केले आहे. घटना उघड झाली तेव्हा प्रदीप वानखडे घरी नव्हते. ते शेगावला गेल्याची माहिती पोलिसांना मिळाली होती. तेथून परत आल्यावर त्यांना पोलिसांनी अटक केली. त्यांची कसून चौकशी सुरू आहे. कौटुंबिक त्रासातून ही घटना घडल्याची चर्चा आहे.