अमरावती मध्यवर्ती कारागृहात गँगवार

म. टा. वृत्तसेवा, अमरावती

येथील मध्यवर्ती कारागृहात कैद्यांच्या दोन गटात गँगवॉर झाल्याची घटना शुक्रवारी दुपारच्या सुमारास घडली. कैद्यांतील तुफान हाणामारीमध्ये पाच कैदी जखमी झाले असल्याचे त्यांच्या नातेवाइकांनी सांगितले आहे.

हाणामारीमध्ये अंजूम वजाहद अली खान, मोहम्मद इरशाद खान इसराईल खान, मोहम्मद रिजवान मोहम्मद सलीम, शेख कय्युम शेख करीम व खालीद हुसैन सबसुम हुसैन असे पाच जण जखमी झाले आहे. जखमींचे नातेवाईक मोहम्मद शादफ गुल हुसैन व मोहम्मद माजीद अब्दुल रहेमान (रा.अचलपूर) यांनी शनिवारी आमदार रवी राणा यांना यासंदर्भात निवेदन दिले. कारागृहात अचलपूर येथील कैदी व अन्य दुसऱ्या गटातील कैद्यांमध्ये वाद झाला. वादाचे पर्यावसन मारहाणीत झाले. अंजूम वजाहदसह पाच जणांना मारहाण करण्यात आली. जखमी कैद्यांना उपचारासाठी जिल्हा सामान्य रुग्णालयात दाखल न करता कारागृहातच त्यांच्यावर उपचार करण्यात आल्याचा आरोप नातेवाइकांनी निवेदनात केला आहे. मारहाणीमुळे कारागृहातील कैद्यांमध्ये दहशतीचे वातावरण असल्याचा आरोप निवेदनकर्त्यांनी केला आहे.