अमरावतीत येत्या शनिवारी- रविवारी जनता कर्फ्यू

अमरावती: करोनाचा प्रादुर्भाव रोखण्यासाठी उपाययोजना म्हणून येत्या शनिवारी आणि रविवारी (ता. ९ आणि १० मे) 'जनता कर्फ्यू' पाळण्यात येणार आहे, अशी माहिती जिल्हाधिकारी शैलेश नवाल यांनी दिली. नागरिकांनी प्रशासनाला सहकार्य करावे, असे आवाहनही त्यांनी केले.

हा जनता कर्फ्यू शनिवारी दुपारी १२ वाजल्यापासून रविवारी रात्री १२ पर्यंत असेल. या काळात रूग्णालये व मेडिकलची दुकाने सुरू राहतील. इतर सर्व सेवा बंद राहतील. शहरात करोना रुग्णांच्या संख्येत सातत्याने वाढ होत आहे. सोमवारी दुपारपर्यंत करोनाबाधित रुग्णांचा आकडा हा ६० वर पोहोचला असून, खबरदारीचा उपाय म्हणून येणाऱ्या शनिवारी आणि रविवारी जनता कर्फ्यूचे नियोजन जिल्हा प्रशासनाच्या वतीने करण्यात आले आहे. करोना प्रतिबंधासाठी व सर्वांच्या सुरक्षिततेसाठी कर्फ्यूचे नियोजन केले आहे. त्यासाठी सर्व नागरिकांनी सहकार्य करण्याचे आवाहन जिल्हाधिकाऱ्यांनी यावेळी केले.

लॉकडाऊनचा कालावधी वाढल्यानंतर राज्य सरकारनं काही क्षेत्र वगळता इतर ठिकाणी विविध सवलती लागू केल्या आहेत. मात्र, अमरावती जिल्ह्यात करोनाबाधितांची संख्या पाहता येथे अद्यापपर्यंत मद्यविक्री दुकानांना परवानगी देण्यात आली नाही. त्यासाठी आधी सर्व संबंधित दुकानदारांची बैठक घेऊन त्यांना राज्य उत्पादन शुल्क आयुक्तांचे निर्देश, नियम आणि अटी शर्ती याबाबत अवगत करून देण्यात येईल. त्यानंतर परवानगीचा विचार करण्यात येईल. अशा दुकानात काम करणाऱ्या व्यक्तींकरिता फिटनेस प्रमाणपत्र देणे आवश्यक राहील. यासोबतच सॅनिटायझर, सोशल डिस्टन्सिंग पालन व इतर आवश्यक नियम पालन करणे बंधनकारक असून त्यानंतरच परवानगी दिली जाईल.

कंटेन्मेंट झोनमध्ये तेथील ये-जा करण्यासाठी काही अत्यावश्यक सेवांना पास दिले आहेत. परिसरात मर्यादित वावर असावा व जीवनावश्यक वस्तूही मिळाव्यात, असा त्याचा हेतू आहे. याशिवाय, रमजान महिना लक्षात घेता मुस्लीम बांधवांसाठी फळं घरपोच देण्याची व्यवस्था करण्यात येत आहे, असंही ते म्हणाले. दरम्यान, करोनाचा यशस्वीपणे मुकाबला करण्यासाठी सर्वांनी घरात सुरक्षित राहावे व नियमांचे पालन करावे, असे आवाहनही त्यांनी केले.

पुण्यात वारजे पुलाखाली कामगारांची गर्दी; पोलिसांचा लाठीमार

पुण्यात करोनामुळे पोलिसासह पाच जणांचा मृत्यू

रेड, ऑरेंज, ग्रीन; राज्यात कोणत्या विभागात कशाला परवानगी?