‘चिंतामणी’च्या ट्रस्टीसाठी नेत्यांना साकडे!

म. टा. प्रतिनिधी, यवतमाळ

कळंबचा चिंतामणी नवसाला पावतो, संकटात धावून येतो अशी भाविकांची श्रद्धा आहे. पण, या मंदिराच्या संचालक मंडळावर निवड व्हावी म्हणून अनेकांनी स्थानिक नेत्यांना साकडे घातले आहे. येत्या २ ऑगस्ट रोजी येथील सहधर्मदाय आयुक्त यांच्या कार्यालयात मुलाखती होणार आहेत.

चिंतामणी गणेश मंदिराच्या १६ संचालकांची निवड केली जाणार आहे. त्यासाठी सुमारे दोन हजारावर अर्ज धर्मदाय आयुक्तांकडे दाखल झाले आहेत. यात राजकीय पक्षाशी संबंधित अनेक जण आहेत. संचालक मंडळावर निवड व्हावी म्हणून अनेकांनी मंत्री, खासदार, आमदार अशा साऱ्यांनी भेटी सुरू केल्या आहेत. दरम्यान, गेल्या १३ वर्षांपासून चिंतामणी देवस्थानमधील संचालकांच्या भांडणामुळे प्रशासकाची नेमणूक करण्यात आली आहे. यवतमाळचे सहाय्यक धर्मदाय आयुक्त हे प्रशासक म्हणून काम पाहात आहेत. नवीन संचालक मंडळ निवडण्यासाठी न्यायालयाने धर्मादाय आयुक्तांना आदेश दिले. त्यानंतर यासंबंधीच्या प्रक्रियेला सुरुवात करण्यात आली आहे.

कळंबच्या चिंतामणीच्या दर्शनासाठी राज्यभरातून हजारो भाविक येतात. पण, अजूनही येथे भाविकांसाठी आवश्यक सुविधा नाहीत. विकासात्मक दृष्टिकोन असलेल्या संचालकांची निवड यातून व्हावी, अशी अपेक्षा भाविकांची आहे.