VIDEO | अमरावतीत विद्यार्थ्यांसह निघालेला ट्रॅक्टर पलटला, २५ जण गंभीर जखमी

अमरावती : अमरावतीत विद्यार्थी प्रवास करत असलेल्या ट्रॅक्टरला अपघात झाला. यात २५ विद्यार्थी गंभीर जखमी झाले आहेत. जखमींना तातडीने दर्यापूर येथील ग्रामीण रुग्णालयात दाखल करण्यात आले आहे. अपघाताचा थरार कॅमेऱ्यात कैद झाला आहे.

अमरावतीच्या दर्यापूरमध्ये जे. डी. पाटील महाविद्यालयात राष्ट्रीय सेवा योजनेचे शिबीर आटोपून विद्यार्थी ट्रॅक्टरने परतत असताना हा अपघात झालाय. अपघाताची माहिती मिळताच रुग्णालयात नातेवाईकांनी गर्दी केली आहे. सध्या पोलीस रुग्णालयात दाखल झाले आहेत. या संदर्भात अधिक तपास पोलीस करत आहेत.

अमरावती जिल्ह्यातील दर्यापूर शहरात असलेल्या नामांकित जे. डी .पाटील महाविद्यालयातर्फे राष्ट्रीय सेवा योजनेच्या माध्यमातून तालुक्यातील जेनपुर येथे राष्ट्रीय सेवा शिबीर सुरू होते. गेल्या सात दिवसांपासून सुरू असलेल्या शिबिराचा आज शेवटचा दिवस होता. शिबीर संपल्यानंतर सर्व विद्यार्थी कॉलेजच्या वतीने भाड्याने घेतलेला ट्रॅक्टर करून दर्यापूरकडे निघाले.

पत्नीसह दोन मुलांना पाण्यात ढकललं, पतीनेही जीवन संपवलं; लेक कशीबशी पाण्याबाहेर आली अन्...
विद्यार्थी हे ट्रॅक्टरने दर्यापूरच्या दिशेने येत असताना जेणपुर येथे ट्रॅक्टर चालकाचे नियंत्रण सुटले आणि तो तोल जाऊन पलटी झाला. या अपघातात ट्रॅक्टर मधील सुमारे २५ ते ३० विद्यार्थी हे गंभीर जखमी झालेले आहेत. जखमी विद्यार्थ्यांना दर्यापूर येथील उपजिल्हा रुग्णालयात उपचार करता दाखल करण्यात आले. मात्र विद्यार्थ्यांची प्रकृती चिंताजनक असल्याने त्यांना आता तातडीने अमरावती येथे हलविण्यात आले आहे.

हॉस्पिटलमध्ये विद्यार्थ्यांचे आई-वडील व नातेवाईक यांनी मोठ्या संख्येने गर्दी केलेली आहे. काही वेळ तणावाचे वातावरण सुद्धा हॉस्पिटलमध्ये निर्माण झालेले होते. घटनास्थळी दर्यापूर पोलीस दाखल झाले असून गर्दी पांगवण्याचा प्रयत्न पोलिसांच्या वतीने करण्यात येत आहे. परंतु महाविद्यालयाच्या वतीने या निष्क्रिय कारभाराचा आता विद्यार्थ्यांचे नातेवाईकांकडून जाहीर निषेध करण्यात येत आहे. महाविद्यालयाकडून अशा निष्क्रिय कारभाराविरोधात आता वरिष्ठ पातळीवर अधिकारी दखल घेणार काय हे पाहणे योग्य ठरणार आहे.

पाहा व्हिडिओ :