राज्यातील सत्तेला पवारांचे छुपे पाठबळ

म. टा. वृत्तसेवा, अमरावती

शिवसेना सरकारविरोधात आंदोलन करीत असले, तरी राज्यातील सरकारला अजिबात धोका नाही. शरद पवारांचे छुपे पाठबळ भाजपला असल्याने सत्तेला धोका नसल्याचे सूचक वक्तव्य केंद्रीय मंत्री रामदास आठवले यांनी केले. अमरावती महापालिकेच्या स्वच्छता अभियानाच्या कार्यक्रमासाठी अमरावती दौऱ्यावर आलेल्या आठवले यांनी शासकीय विश्रामगृह येथील पत्रकार परिषदेत सरकारच्या कामगिरीचे कौतुक करून काँग्रेसचे भविष्य अंधारमय असल्याची टीका केली.

शिवसेना सरकारविरोधात आंदोलन करीत असली, तरी २०१९पर्यंत ती सोबत आहे. त्यामुळे सरकार पडण्याची शक्यता नाहीच. तशी वेळ आली तरी शरद पवार एनडीएचे छुपे पाठीराखे आहेत. त्यांच्या पाठींब्यावर सरकार तरणार आहे. प्रसंगी आपणही १५ आमदारांची जुळवाजुळव करणार आहोत, असा विश्वास त्यांनी दर्शविला. पंतप्रधान नरेंद्र मोदी यांच्या नेतृत्वात केंद्र सरकार चौफेर चांगली कामगिरी करीत आहे. आर्थिक स्वच्छतेसाठी त्यांनी नोटाबंदीचा निर्णय घेतला आहे. जीएसटीमुळेदेखील देशाच्या अर्थव्यवस्थेत सुधारणा होणार आहे. केंद्रीय मंत्री नितीन गडकरी यांच्या नेतृत्वात रस्त्यांचे जाळे विणल्या जात आहे. नागपूर-मुंबई समृद्धी महामार्ग, जनधन योजना, उज्ज्वला गॅस योजनेचा लाभ होत आहे. सरकारने सर्वसामान्यांना दिलासा दिला असल्याचा दावाही त्यांनी केला. दलितांसोबतच मराठा समाजाला आरक्षण मिळाल्यास ऐक्य निर्माण होण्यास मदत होईल, असेही आठवले म्हणाले.