पोलिसाला मारहाण: आमदार बच्चू कडू यांना जामीन

अमरावती :

वाहतूक पोलिसाला मारहाण केल्याप्रकरणी अचलपूर न्यायालयानं एक वर्षांची शिक्षा ठोठावलेले अपक्ष आमदार बच्चू कडू यांना जामीन मंजूर करण्यात आला आहे. त्यामुळं त्यांना मोठा दिलासा मिळाला आहे.

गेल्या वर्षी मार्च महिन्यात बच्चू कडू आपल्या सहकाऱ्यांसोबत परतवाडा एस टी डेपो चौकातून जात होते. संध्याकाळी तिथे अनेक खासगी ट्रॅव्हल्स उभ्या असलेल्या दिसल्याने बच्चू कडूंनी त्या परिसरातील वाहतूक पोलीस इंद्रजीत चौधरी यांना बसेसवर कारवाई का करत नाही, असा जाब विचारला. परंतु, समाधानकारक उत्तर न मिळाल्याने आमदार कडू आणि त्यांच्या सहकाऱ्यांनी अश्लिल शिवीगाळ करून चौधरी यांना धक्काबुक्की आणि मारहाण केली. या प्रकरणी चौधरी यांनी बच्चू कडू यांच्या विरोधात परतवाडा पोलीस ठाण्यात गुन्हा दाखल केला. त्या प्रकरणाच्या सुनावणी दरम्यान आज कोर्टानं बच्चू कडूंना दोषी ठरवत एक वर्षाचा तुरुंगवास व ६०० रुपयांच्या दंडाची शिक्षा सुनावली.

निकालानंतर काही वेळातच कडू यांनी जामिनासाठी अर्ज केला. न्यायालयानं तो मंजूरही केला.