विद्यार्थ्याच्या दप्तरात आढळला कोब्रा!

म. टा. प्रतिनिधी, अमरावती

मेळघाटातील शाळा दुरुस्तीसाठी कोट्यवधी रुपयांचा निधी मिळत असला तरी त्याचा वापर होत नसल्याने या भागातील विद्यार्थ्यांची सुरक्षितता धोक्यात आली आहे. शाळांची डागडुजी व दुरुस्ती करणत येत नसल्याने सापासारखे विषारी प्राणी शाळांमध्ये वास्तव्य करू लागले आहेत. बदनापूर येथील शाळेत एका विद्यार्थ्यांच्या दप्तरात चक्क जहाल कोब्रा साप आढळल्याने खळबळ उडाली आहे.

चिखलदरा पंचायत समिती अंतर्गत येणाऱ्या बदनापूर येथील जि.प. शाळेत ही घटना घडली. गुरुपौर्णिमेच्या दिवशी विद्यार्थ्यांनी शाळेत प्रवेश केल्यानंतर वर्गाला सुरुवात जाली. इयत्ता दुसरीमध्ये शिकणारा राजा धांडे हा विद्यार्थी देखील त्याच्या वर्गमित्रांसोबत शाळेत गेला. राजाच्या दप्तरामध्ये काही तरी शिरल्याचे तेथील एका विद्यार्थ्यांच्या लक्षात आले. ही बाब त्याने वर्ग शिक्षकांना सांगितली. शिक्षकांनी काठीच्या सहाय्याने दप्तराची तपासणी केली. यावेळी दप्तरात एक कोब्रा साप आढळून आला. यामुळे शिक्षकांसह विद्यार्थ्यांचा थराकाप उडाला. मुख्याध्यापक, अन्य शिक्षक व शिपायाच्या मदतीने सापाला पकडून जंगलात सोडून देण्यात आले. या घटनेमुळे शाळेतील विद्यार्थ्यांमध्ये भीतीचे वातावरण निर्माण झाले आहे. पालकांमध्ये देखील या घटनेमुळे चिंता निर्माण झाली आहे. दरम्यान, या प्रकारामुळे मेळघाटातील विद्यार्थ्यांची असुरक्षितता पुन्हा एकदा चव्हाट्यावर आली आहे.