वेगळ्या विदर्भासाठी दिल्लीत धरणे

वाशीमः विदर्भ राज्य आंदोलन समितीच्यावतीने येत्या ३१ मार्चला स्वतंत्र विदर्भ राज्यासाठी दिल्लीतील जंतर-मंतरवर धरणे आंदोलन करण्यात येणार आहेत. तेलंगणचे मुख्यमंत्री चंद्रशेखर राव यांना धरणे आंदोलनात मार्गदर्शन करण्यासाठी बोलविण्यात आले आहे. तसेच विदर्भ राज्याच्या मागणीसाठी पंतप्रधानांना वेळ मागितला असल्याची माहिती विदर्भ राज्य आंदोलन समितीच्या बैठकीत अॅड. वामनराव चटप यांनी दिली.

अॅड. चटप म्हणाले, विदर्भ राज्य आंदोलन समितीचे एक शिष्टमंडळ २८ मार्च ते २ एप्रिलदरम्यान दिल्ली येथे थांबून महत्त्वाच्या नेत्यांच्या भेटीगाठी घेत स्वतंत्र राज्याची चर्चा करून निवेदन देणार आहेत. विदर्भातील दोन मुख्य नेत्यांनी भाजपाची केंद्रात सत्ता आल्यास स्वतंत्र विदर्भ देऊ, असे ठोस आश्वासन दिले होते. त्यानंतर केंद्र व राज्य सरकारला दोन वर्षे झाली आहेत. आश्वासनांचा त्यांना विसर पडला आहे. ५ डिसेंबर २०१५ला समितीचे हजारो कार्यकर्ते मुख्यमंत्र्यांना भेटायला गेले असता त्यांनी टाळले. म्हणून या आंदोलनासाठी संपूर्ण विदर्भात जनजागृती मोहीम हाती घेण्यात आली आहे, असेही त्यांनी सांगितले.