सोन्याचे तीन मुकुट गहाळ

अमरावती : तिरुपती येथील श्री गोविंदराज स्वामी मंदिरातील एकूण एक किलो तीन ग्रॅम वजनाचे तीन सोन्याचे मुकुट गहाळ झाल्याचे अधिकृत सूत्रांकडून रविवारी सांगण्यात आले. मंदिराच्या अंतर्गत भागातील प्राचीन मंदिरातील श्री वेंकटेश्वर, श्री लक्ष्मी आणि श्री पद्मावती या देवतांचे हे मुकुट होते. तिरुमला तिरुपती देवस्थानच्या सुरक्षाव्यवस्थेने अधिकृतपणे शनिवारी रात्री ते गहाळ झाल्याचे सांगितले. गुन्हेगारांना पकडण्यासाठी मंदिराच्या आवारातील सीसीटीव्ही कॅमेऱ्यांचे फूटेज तपासण्यात येत असून, देवस्थानने पोलिसांकडे तक्रार नोंदवली आहे. पोलिसांनी चौकशी सुरू केली असून, अद्याप कुणालाही अटक करण्यात आलेली नाही.