​ उमरखेडमध्ये तणावपूर्ण शांतता

म. टा. प्रतिनिधी, यवतमाळ

उमरखेड येथे गुरुवारी सायंकाळच्या सुमारास गणेश विसर्जन मिरवणुकीवर काही जणांनी दगडफेक केल्याने तणाव निर्माण झाला. मिरवणूक जागीच थांबवित कारवाई होईपर्यंत गणेशमूर्तींचे विसर्जन न करण्याचा निर्णय मंडळाच्या कार्यकर्त्यांनी घेतला. मध्यरात्री या प्रकरणात ३४ जणांना अटक करण्यात आल्यानंतर पैनगंगा नदीवर गणेशमूर्तींचे विसर्जन करण्यात आले. दरम्यान, शुक्रवारी शहरात तणावपूर्ण शांतात होती. व्यापाऱ्यांनी प्रतिष्ठाने बंद ठेवल्याने अघोषित संचारबंदीची स्थिती होती.

दहा दिवस बाप्पाची मनोभावे पूजा केल्यानंतर गुरुवारी गणेश मंडळांच्या कार्यकर्त्यांनी विसर्जन मिरवणूक काढली. पण, शहरातील काही ज‌णांनी मिरवणुकीवर दगड आणि विटांचा मारा केला. अचानक झालेल्या या प्रकाराने मिरवणूक वाटेतच थांबविण्यात आली. कार्यकर्ते संतप्त झाल्याने शहरात तणाव निर्माण झाला. जमावाला पांगविण्यासाठी पोलिसांनी हवेत गोळीबारही केला होता. रात्रीच अमरावती विभागाचे विशेष पोलिस महानिरीक्षक विठ्ठल जाधव, पोलिस अधीक्षक अखिलेश सिंह यांच्यासह अमरावती विभागातील अनेक पोलिस अधिकारी उमरखेडला पोहचले. तगडा पोलिस बंदोबस्त तैनात करण्यात आल्याने शहराला पोलिस छावणीचे स्वरूप आले होते. त्यातच मंडळाच्या कार्यकर्त्यांनी समाजकंटकांना अटक होईस्तोवर विसर्जन न करण्याचा निर्धार जाहीर केला. पोलिसांनी तातडीने तपासचक्रे फिरवित सुमारे ३४ जणांना अटक केली. त्यांच्याविरुद्ध भादंवि कलम ३५३, ३२४, ३०६ अन्वये गुन्हे दाखल केले आहेत.