अमरावतीः 'या' गावातील स्मशानभूमीत ग्रामस्थ करतात डब्बा पार्टी

अमरावती: व्यक्तीच्या मृत्यूनंतर त्याच्यावर ज्या ठिकाणी अंत्यसंस्कार केले जाते ती जागा म्हणजे स्मशानभूमी. स्मशानभूमीबद्दल २१ व्या शतकातही अनेकांच्या मनात विविध गैरसमज, भीती आणि दहशत पाहायला मिळते. त्यामुळे अनेकजण स्मशानभूमीत जाणे टाळतात. आजही महिला स्मशानभूमीमध्ये जाण्यास हिंमत करत नाही. पण वरुड तालुक्यातील हातुर्णा या गावात मात्र वेगळं चित्रं आपल्याला पहायला मिळते.

या गावातील स्मशानभूमीत लहान मुलापासून ते महिलांपर्यंत सर्वांचा इथे मुक्त वावर असतो. स्मशानभूमीला येथील ग्रामस्थ रमणीय ठिकाण समजतात. दिवसभर येणाऱ्या जाणाऱ्यांची मोठी वर्दळ असते. स्मशानभूमीत गेल्यास एखाद्या छोट्या पर्यटनस्थळी आल्याचे समाधान मनाला वाटतं. त्याचे कारणही तसचं आहे. अमरावती, वर्धा आणि नागपूर जिल्ह्याच्या सीमेवर वर्धा नदीच्या तीरावर अमरावती जिल्ह्यातील हातुर्णा हे शेवटचे गाव आहे.

वाचाः गडकरीच युतीचा पूल बांधू शकतात, सत्तारांचा पुनरुच्चार; आता कारणही सांगितलं

पूर्वी या गावातील स्मशानभूमी वर्धा नदीपात्रात होती. दोन दशकांपूर्वी वर्धा नदीवर अप्पर वर्धा धरणाची निर्मिती झाल्यानंतर नदीच्या तिरावर दोन ते तीन एकर जागेवर माजी आमदार नरेशचंद्र ठाकरे यांच्या संकल्पेतुन या स्मशानभूमीची पायाभरणी करण्यात आल्याची माहिती गावकऱ्यांनी दिली.

वर्धा नदीला बाराही महिने मुबलक पाणी असते. त्यामुळे हिरव्यागार झाडांनी ही स्मशानभूमी बहरली आहे. मोठ-मोठे वृक्ष, फुलांची हिरवीगार झाडे, मोठ्या झाडांवर रंगेबीरंगी चित्र, संताचे चित्र या स्मशानभूमीत दिसून येतात. रमणीय वातावरण असल्याने आजूबाजूच्या गावांतील लोक देखील या ठिकाणी थेट डबा पार्टी करायला येतात. तसेच वर्धा-अमरावती जिल्ह्याला जोडणारा मोठा पूल असल्याने विलोभनीय दृश्य पाहायला मिळते.

वाचाः काय म्हणता! पूर्ण सोसायटीने केला आत्मदहनाचा प्रयत्न; कारण ऐकून व्हाल हैराण...