यवतमाळ जिल्हा कृषी अधिकारी निलंबित?

म. टा. वृत्तसेवा, यवतमाळ

कीटकनाशक फवारणीत शेतकरी आणि शेतजमजुरांचे बळी गेल्यानंतर सरकारने कारवाईचा बडगा उगारण्यास सुरुवात केली आहे. जिल्हा कृषी अधिकारी दत्तात्रय काळसाईत यांना निलंबित करण्यात आल्याची माहिती आहे. तर यवतमाळ शासकीय वैद्यकीय महाविद्यालयाचे डीन डॉ. अशोक राठोड हे सुट्टीवर गेले आहेत.

कीटकनाशकाच्या फवारणीमुळे २० शेतकरी, शेतमजुरांचा मृत्यू झाला आहे. सरकारने कारवाई केल्यानंतर यवतमाळचे कृषी अधिकारी दत्तात्रय काळसाईत यांना निलंबित केल्याचे सांगण्यात आले होते. पण, बुधवारी दिवसभर काळसाईत त्यांच्या कार्यालयातच उपस्थित होते. मनसे कार्यकर्ते त्यांच्या कार्यालयात आले तेव्हाही तेच कृषी अधिकाऱ्याच्या खर्चीवर होते. त्यावरून त्यांना अद्याप निलंबनाचा आदेश मिळाला नसावा, अशी चर्चा आहे. दुसरीकडे गेल्या काही दिवसात रुग्णावर उपचारात हयगय होत असल्याचा आरोप असलेले वैद्यकीय महाविद्यालयाचे डीन डॉ. अशोक राठोड हे सुट्टीवर गेले असून प्रभारी डीन म्हणून नागपूरचे डॉ. मनीष श्रीगिरीवार रुजू झाले आहेत.