काँग्रेसचे जिल्हाध्यक्ष कासावारांचा राजीनामा

म.टा. प्रतिनिधी, यवतमाळ

गेल्या काही महिन्यांपासून वादग्रस्त झालेले यवतमाळ जिल्हा काँग्रेसचे अध्यक्ष माजी आमदार वामनराव कासावार यांनी आपल्या पदाचा राजीनामा दिला आहे. मंगळवारी पत्रपरिषदेत त्यांनी आपल्या राजीनाम्याची घोषणा केली. विधान परिषद, नगरपरिषद निवडणुकीत काँग्रेसचा जिल्ह्यात झालेल्या दारूण पराभवाची जबाबदारी घेऊन आपण राजीनामा देत आहोत. अखिल भारतीय काँग्रेस कमेटीच्या अध्यक्षा सोनिया गांधी यांच्याकडे राजीनामा पाठविल्याचेही त्यांनी यावेळी सांगितले.

लोकसभा निवडणुकीत जिल्ह्यात झालेल्या काँग्रेसच्या पराभवानंतर वामनराव कासावार यांनी जिल्हाध्यक्ष पदाचा राजीनामा दिला होता. पक्षातील अंतर्गत गटबाजीमुळे नवा अध्यक्ष निवडला गेला नाही. त्यामुळे कासावार हे या पदावर कायम होते. माजी मंत्री आणि पक्षाचे नेते शिवाजीराव मोघे यांचा गट त्यांना पदावरून दूर करण्यासाठी प्रयत्नशील होता, तर माजी प्रदेशाध्यक्ष मा‌णिकराव ठाकरे यांचे पाठबळ असल्याने ते ‌पक्षाच्या जिल्हाध्यक्ष पदावर कायम होते. नुकत्याच झालेल्या विधान परिषद आणि नगरपरिषद निवडणुकीत काँग्रेसचा दारूण पराभव झाला. अनेक नगरपरिषदांत काँग्रेस पक्षाचे उमेदवार तिसऱ्या क्रमांकावर फेकल्या गेले. कासावार यांच्या वणीतही काँग्रेसला मोठा फटका बसून तेथे पक्षाचा एकही नगरसेवक विजयी होऊ शकला नाही. याचा फायदा घेऊन पक्षातील त्यांचे विरोधक आक्रमक होण्याची शक्यता लक्षात घेऊन त्यांनी हा राजीनामा दिल्याचे बोलले जात आहे. मंगळवारी सकाळी माजी प्रदेशाध्यक्ष माणिकराव ठाकरे यांची भेट घेऊन त्यांनी आपल्या निर्णयाची माहिती दिली.

त्यांनी राजीनामा दिल्यानंतर काँग्रेसच्या जिल्हाध्यक्षपदासाठी माजी मंत्री संजय देशमुख, माजी उपसभापती प्रा. वसंत पुरके, जिल्हा परिषदेचे माजी सभापती नानू देशमुख यांची नावे चर्चेत आहेत.