बँकेच्या रांगेतील शेतकऱ्याचा हृदयविकाराने मृत्यू

म.टा. वृत्तसेवा, यवतमाळ

उमरखेड तालुक्यातील ढाणकी येथील स्टेट बँकेच्या शाखेत पैसे काढण्यासाठी रांगेत ताटकळत उभ्या असलेल्या भाऊराव पाईकराव (वय ६७) या शेतकऱ्याचा रांगेतच हृदयविकाराच्या झटक्याने मृत्यु झाला. मंगळवारी घडलेल्या या घटनेमुळे परिसरात खळबळ उडाली आहे. पाईकराव यांच्यावर बुधवारी ढाणकी येथे अंत्यसंस्कार करण्यात आले.

भाऊराव पाईकराव यांचे ढाणकी येथील स्टेट बँक शाखेत जनधन खाते होते. पैश्याची गरज असल्याने ते बँकेत गेले होते. मात्र, बँकेत ग्राहकांची मोठी गर्दी असल्याने त्यांना रांगेत बराचकाळ ताटकळत उभे राहावे लागले. यामुळे भोवळ आल्याने ते खाली कोसळले. रांगेतील नागरिकांनी पाईकराव यांना उपचारासाठी जवळच्या रुग्णालयात नेले. डॉक्टरांनी तपासून त्यांना मृत घोषित केले. ग्रामीण भागात आजही पैसे काढण्यासाठी ग्राहकांना रांगेत तास न तास ताटकळत उभे राहावे लागत असल्याचा संताप व्यक्त झाला.