मोदींकडून दाभाडीवासीयांची निराशाच

म.टा. वृत्तसेवा, यवतमाळ

लोकसभा निवडणुकीपूर्वी विद्यमान पंतप्रधान नरेंद्र मोदी हे आर्णीपासून ५ किमी अंतरावर असलेल्या दाभाडी गावात आले होते. ‘चाय पे चर्चा’ या कार्यक्रमा अंतर्गत त्यांनी देशभरातील शेतकऱ्याशी चर्चा केली. दाभडीला येताच त्यांनी सर्वात आधी दाभडीचे सरपंच संतोष टाके यांच्या शेतात जाऊन तेथे जमलेल्या दाभाडीतील शेतकऱ्यांशी चर्चा केली. त्यांच्या व्यथा ऐकून मोदी भावनाप्रधान झाले होते. शेतकऱ्याच्या पाठीवर हात देऊन त्यांनी त्यांना दिलासाही दिला होता. मात्र, त्यानंतरही त्यांच्या प्रश्नाची सोडवणूक न झाल्याने दाभडीवासी मोदींविषयी नाराजी व्यक्त करीत आहेत.

दाभडी येथे लोकसभा निवडणुकीपूर्वी झालेल्या कार्यक्रमात मोदी यांनी शेतीमालाला मिळत असलेल्या किमतीबाबत नाराजी व्यक्त केली होती. आपले सरकार आल्यास स्वामिनाथन आयोगाप्रमाणे शेतीचा खर्च अधिक ५० टक्के नफा, शेतकऱ्याला शेतीच्या मालाची किंमत मिळेल, कोरडवाहू शेतकऱ्यांना भरपूर पाणी, २४ तास वीज सहज स्वस्त बियाणे, खते मिळतील हे सर्व ऐकल्यावर दाभडीवासियांना तर मोदी यांचे ‘अच्छे दिन’ म्हणजे हेच काय, असे वाटत आहे.

काँग्रेसचा बालेकिल्ला असलेला दाभडीचा गट पूर्ण भाजपमय झाला. शेतकरी आत्महत्यांबाबत तर मोदी यांनी ‘शेतकरी आत्महत्या देशाला कलंक आहेत’, असे सांगत या सरकारला याची लाज वाटायला पाहिजे असेही त्यांनी ठणकावले होते. मात्र त्यानंतर मोदी यांनीही येथील शेतकऱ्यांच्या दुःखावर फुंकर न घातल्याची नाराजी येथील शेतकरी व्यक्त करीत आहेत.