विदर्भ राज्याचे आश्वासन पूर्ण करा

म.टा. प्रतिनिधी, यवतमाळ

स्वतंत्र विदर्भ राज्य निर्मितीसाठी वारंवार मागणी करूनही शासनाला जाग येत नाही, सत्तारूढ भाजपने स्वतंत्र विदर्भासाठी दिलेल्या आश्वासनाचा त्यांना विसर पडला आहे. त्यामुळे शासनाला त्यांच्या आश्वासनाची आठवण करून देण्यासाठी विदर्भ राज्याच्या सीमेवर असलेल्या उमरखेडमधून बुधवार विदर्भ दिंडी काढण्यात आली. विदर्भ राज्य आंदोलन समितीचे कोअर सम‌िती सदस्य अरविंद देशमुख व ज्येष्ठ स्वातंत्र्यसैनिक रंगराव देशमुख यांनी हिरवी झेंडी दाखवून दिंडीला सुरुवात केली. यावेळी मोठ्या संख्येने विदर्भप्रेमी नागरिक उपस्थित होते.

यावेळी शेतकरी संघटनेच्या सरोजताई काशीकर यांनी, विदर्भाचे स्वतंत्र राज्य व्हावे, यासाठी ही विदर्भ दिंडी काढण्यात आली असून पुसद, नेर, यवतमाळ, वर्धा मार्गे ५ डिसेंबर रोजी ही दिंडी नागपूर येथे पोहोचणार आहे. वेगळ्या विदर्भ राज्यासाठीच्या या विदर्भ दिंडीत नागरिकांनी मोठ्या संख्येने सहभागी व्हावे, असे आवाहन त्यांनी केले. यावेळी शेतकरी संघटनेच्या शैलजा देशपांडे, गुणवंतराव पाटील, विदर्भ राज्य आंदोलन समितीचे जिल्हाध्यक्ष कृष्णराव भोंगाडे, भाजपचे जिल्हा सचिव नितीन भुतडा यांच्यासह विदर्भ राज्य आंदोलन समितीचे पदाधिकारी, कार्यकर्ते मोठ्या संख्येने उपस्थित होते.