म. टा. प्रतिनिधी, औरंगाबाद
कारमध्ये नेण्यात असलेली २५ लाख रुपयांची रक्कम निवडणूक आयोगाच्या स्थिर सर्वेक्षण पथकाने जप्त केली. आंबेडकर चौक ते सिडको बसस्टँड रोडवरील वोखार्ड कंपनीजवळ बुधवारी सायंकाळी ही कारवाई करण्यात आली. दरम्यान, ही रक्कम शहरातील 'एटीएम'मध्ये भरणाऱ्या कंपनीची असल्याचा दावा संबंधितांनी केला. ही रक्कम जप्त करण्यात आली असून, ट्रेझरीमध्ये जमा करण्यात आली आहे.
वोक्हार्ट कंपनीजवळ स्थिर सर्वेक्षण पथक क्रमांक पाचचे प्रमुख सी. एल. बेग आणि कर्मचारी बुधवारी सायंकाळी वाहनतपासणी करीत होते. यावेळी त्यांनी तवेरा कार (एमएच २० एए ६३०१) तपासणीसाठी अडवली. या कारमध्ये मधल्या सिटवरील व्यक्तीजवळ काळ्या रंगाची स्कूल बॅग आढळली. या बॅगची तपासणी केली असता, त्यामध्ये ५०० रुपयाच्या नोटांची प्रत्येकी हजार नोटा असलेली पाच बंडले आढळली. ही रक्कम एकूण २५ लाख रुपये होती. कारमध्ये यावेळी संदीप लोखंडे, सचिन मोरे, सुनील प्रभू आणि राहुल घाटे हे चौघे होते. यापैकी संदीप लोखंडे यांनी ही रक्कम शहरातील 'एटीएम'मध्ये रक्कम भरण्यासाठी कंत्राट देण्यात आलेल्या 'लॉगीकॅश सोल्युशन' कंपनीची असल्याचे सांगितले. शहागंज येथील 'एसबीआय' बँकेतून मोठी रक्कम काढली असून, ती शहरातील 'एटीएम'मध्ये भरली. ही उर्वरित रक्कम देखील 'एटीएम'मध्ये भरणार असणार असल्याची माहिती संबंधितांनी दिली. पथकाने अधिक तपासासाठी ही २५ लाख रुपयांची रक्कम पंचनामा करून जप्त केली. ही रक्कम कोषागार कार्यालयात जमा केली आहे. स्थिर सर्वेक्षण पथकाचे कर्मचारी काटकर, लिपाने, विजय पंडुरे आणि व्हिडियोग्राफर जितेंद्र गायकवाड यांनी ही कामगिरी केली.