दुसऱ्या लाटेत देशात १२० डॉक्टरांचा बळी; राज्यातील २५ जणांचा समावेश

म. टा. प्रतिनिधी, औरंगाबाद: करोनाच्या दुसऱ्या लाटेतील महाउद्रेकात रुग्णांना दिवस-रात्र सेवा देत असताना देशभरातील १२० डॉक्टरांचा मृत्यू झाला आहे. मृत डॉक्टरांमध्ये महाराष्ट्रातील तब्बल २५ ड़ॉक्टरांचा समावेश असून, सर्वाधिक ५० डॉक्टरांचा मृत्यू हा बिहारमध्ये झाल्याचे स्पष्ट झाले आहे. एकीकडे मृत्युमुखी पडणाऱ्या डॉक्टरांचे प्रमाण सातत्याने वाढत आहे, तर दुसरीकडे पहिल्या लाटेमध्ये मृत्युमुखी पडलेल्या तब्बल ५८८ डॉक्टरांना 'प्रधान मंत्री गरीब कल्याण पॅकेज'अंतर्गत (पीएमजीकेपी) कोणतीही आर्थिक मदत मिळालेली नाही, अशी एकंदरीत वस्तुस्थिती आहे.

मृतांचा आकडा दररोज वाढत आहेत आणि तो देशभर वाढत असल्याचेही सुस्पष्ट झाले आहे. धक्कादायक म्हणजे दुसऱ्या लाटेमध्ये मृत्युमुखी पडलेल्या डॉक्टरांमध्ये अनेक तरुण डॉक्टरांचा समावेश आहे. मृतांमध्ये २८ ते ७२ वयोगटातील डॉक्टरांचा समावेश असला तरी, यामध्ये तिशीतील तसेच चाळीशीतील डॉक्टरांची संख्या जास्त असल्याचे निरीक्षण इंडियन मेडिकल असोसिएशनचे राष्ट्रीय महासचिव डॉ. जयेश लेले यांनी 'मटा'शी बोलताना नोंदवले.

'पीएमजीकेपी'ची मदत हवीच

करोनाग्रस्तांची सेवा करताना मृत्युमुखी पडलेल्या डॉक्टर व समस्त आरोग्य रक्षकांसाठी 'प्रधान मंत्री गरीब कल्याण पॅकेज'अंतर्गत (पीएमजीकेपी) ५० लाख रुपयांच्या आर्थिक मदतीची विमा योजना केंद्र सरकारने जाहीर केली. मात्र ७५६ पैकी तब्बल ५८८ मृत डॉक्टराच्या कुटुंबियांना या विम्याचा लाभ मिळालाच नाही. तसेच मोठ्या दबावानंतर या योजनेला नुकतीच मुदतवाढ देण्यात आली असली तरी ५८८ डॉक्टरांच्या कुटुंबीयांपर्यंत ही मदत अजूनही पोहोचलेली नाही. पहिल्या लाटेतील डॉक्टरांच्या कुटुंबीयांपर्यंत ही मदत पोहोचली नसेल तर, दुसऱ्या लाटेत मृत्युमुखी पडलेल्या डॉक्टरांच्या कुटुंबियांपर्यंत ही मदत कधी पोहोचणार, असाही सवाल उपस्थित केला जात आहे.