​ सुलिभंजन-म्हैसमाळ प्राधिकरणाला २.५ कोटी

औरंगाबाद : ‘म्हैसमाळ, वेरूळ, खुलताबाद, सुलिभंजन पर्यटन विकास आराखड्यासाठी ४३८ कोटी ४४ लाखांपैकी अडीच कोटी रुपये नुकतेच प्रशासनाला प्राप्त झाले आहेत,’ अशी माहिती जिल्हाधिकारी नवल किशोर राम यांनी दिली. अडीच कोटी रुपयांमध्ये पहिल्या टप्प्यात प्रामुख्याने रस्ते, पाणीपुरवठा व विजेच्या संदर्भात कामे करण्यात येणार आहेत.
जिल्ह्यातील पर्यटनस्थळांचा विकास करण्यासाठी विविध योजना राबविण्यात येणार होते. प्राधिकरणांतर्गंत म्हैसमाळ, सुलिभंजन, वेरूळ, खुलताबाद या पर्यटनस्थळांचा विकास करण्यासाठी शासनाने ४३८ कोटींचा निधी मंजूर केला होता. हा निधी तीन टप्प्यांत मिळणार असून, पहिल्या टप्प्यात १३५ कोटींची कामे करण्यासाठी अर्थसंकल्पात निधीची तरतूद करण्यात आली होती. यातील अडीच कोटींचा निधी प्राप्त झाला आहे. प्राधिकरणांतर्गत रस्ते विकास, सुलिभंजन आणि म्हैसमाळ करिता पाणीपुरवठा तसेच मलनिस्सारण, लघुप्रकल्प बांधकाम, साठवण क्षमता वाढवणे, धर्मशाळा बांधणे आदी कामांचा यामध्ये समावेश आहे.