धक्कादायक ! 'त्या' दोन बिबट्यांवर विषप्रयोगाचा संशय; वन विभागाने तिघांना घेतलं ताब्यात

औरंगाबाद: सोयगाव तालुक्यातील जरंडी शिवारातील दोन बिबट्यांचा एकापाठोपाठ मृत्यू झाल्याने खळबळ उडाली होती. मात्र बिबट्यांचा मृत्यू विषप्रयोगातून झाल्याचे उघडकीस येताच वनविभागाने धडक कारवाई करत तीन संशयितांना ताब्यात घेतले. दोन्ही बिबट्यांना मृत शेळ्यांवर विषप्रयोग करून मारल्याचा संशय वन विभागाला आहे.

जरंडी शिवारात २३ फेब्रुवारीला पाच वर्षीय नर बिबट्या अत्यवस्थेत आढळून आला होता. त्यानंतर वन विभागाकडून तात्काळ वैद्यकीय पथकाला बोलवण्यात आले. मात्र तोपर्यंत या बिबट्याने प्राण सोडले होते. या घटनेच्या दुसऱ्याच दिवशी २४ फेब्रुवारीला पुन्हा एकदा मादी बिबट्या अत्यवस्थेत आढळून आली. पशुवैद्यकीय पथकाकडून तिच्यावर उपचार करण्यात येत होते. मात्र तिचाही उपचारादरम्यान मृत्यू झाला.

वाचाः शेतकरी आंदोलनाचा भडका; संतप्त शेतकऱ्यांनी महावितरणचे कार्यालय पेटवले

या दोन्ही बिबट्यांचा मृत्यू वन विभागाला सुरुवातीपासून संशयित वाटत होता. त्यामुळे बिबट्याच्या मृत्यूनंतर वनविभागाने दहा कर्मचाऱ्यांच्या पथकाला तपासासाठी २४ तास तैनात करत घटनास्थळाची पाहणी करण्याचे आदेश दिले. यात घटनास्थळालगत एका ठिकाणी मृत शेळीचा सांगाडा आढळून आला. यात विषप्रयोगाचा अंदाज बळावल्याने त्याचा धागा पकडत वन विभागाने तीन संशयितांना अटक केली आहे. त्यामुळे पुढील चौकशीतून या प्रकरणाचे गूढ उकलणार असल्याचे बोलले जात आहे.

वाचाः आयकर विभागाचे पथक यशवंत जाधवांच्या घरून परतले; ७२ तासांची चौकशीत हाती काय लागलं?