जिल्ह्यातील २५० शिक्षक कार्यमुक्त

औरंगाबाद ः जिल्हा परिषद प्राथमिक व माध्यमिक शिक्षकांच्या आंतर जिल्हा बदल्यांच्या ऑनलाइन प्रक्रियेत बाहेरच्या जिल्ह्यात जाणारे २९०पैकी २६० शिक्षक नुकतेच कार्यमुक्त करण्यात आले. त्यांच्या ठिकाणी तेवढेच शिक्षक येणे अपेक्षित असून, प्रत्यक्षात १५० शिक्षक येणार असल्याचे सूत्रांनी सांगितले. त्यामुळे विद्यार्थ्यांची अडचण कायम राहणार आहे.

आंतरजिल्हा प्रक्रियेत राजकीय हस्तक्षेप कमी करण्यासाठी प्रशासनाने यंदा ऑनलाइन पद्धतीने प्रक्रिया राबविली. १४ मार्च रोजी ग्रामविकास विभागाचे प्रधान सचिव असिम गुप्ता यांच्यासोबत याबाबत मुंबईत राज्यातील सर्व जिल्हा परिषदेचे प्राथमिक, माध्यमिक शिक्षणाधिकारी, शिक्षक संघटनांचे प्रतिनिधी आदींची बैठक झाली. त्यानंतर आंतर जिल्हा बदलीसंदर्भात २७ जानेवारी रोजी शासन निर्णय काढण्यात आला. निर्णयानंतर कक्ष अधिकारी ग्राम विकास व जलसंधारण यांनी १७ जिल्ह्यांमधील ऑनलाईन बदल्यांसदर्भाचे वेळा पत्रक जाहीर केले, त्यानुसार १५ मेपर्यंत औरंगाबाद जिल्ह्यातील शिक्षकांनी ऑनलाइन अर्ज केले होते. त्यानुसार जिल्ह्यातून २९० शिक्षक इतर जिल्ह्यात बदलीस पात्र ठरले. शिक्षण विभागाने यातील २५९ शिक्षकांना टप्याटप्यांने कार्यमुक्त केले आहे.

जागा वर्षभर रिक्त!
बाहेरच्या जिल्ह्यासाठी पात्र ठरलेल्या शिक्षकांएवढीच संख्या जिल्ह्यात येणाऱ्या शिक्षकांची हवी, असे अपेक्षित आहे, परंतु त्यांची संख्या केवळ दीडशेपर्यंत असल्याची माहिती सूत्रांनी दिली. त्यामुळे कमी शिक्षक असल्याचा फटका पुन्हा विद्यार्थ्यांना बसण्याची शक्यता आहे. या जागा वर्षभर रिक्त राहण्याची शक्यता आहे.