२९ लाखांचा गंडा; जामीन फेटाळला

औरंगाबाद: ऋषिकेश कम्युनिकेशन आणि जयभद्रा टोबॅकोच्या दुकानामध्ये काम करणाऱ्या अकाउंटंटने २९ लाख ५० हजार रुपयाचा अपहार केला. त्याचा अटकपूर्व जामीन अतिरिक्त सत्र न्यायाधीश पौर्णिमा कर्णिक यांनी फेटाळला.

हडको येथील सुधाकर धाडबळे यांचे ऋषिकेश कम्युनिकेशन आणि जयभद्रा टोबॅको ही दुकाने आहेत. त्या दुकानात अकांउंटटसाठी सुदाम नानासाहेब भांडवलकर (रा. अंबड टाकळी ता. पैठण) हा गेल्या काही वर्षापासून कामाला होता. त्याला कार्यालयातील सर्व पासवर्ड माहित होते. तो व्होडाफोन कंपनीला पैसे भरून लॅपटॉप , रिचार्ज कार्ड खरेदी करून आणून तो शहरातील अन्य किरकोळ दुकानांमध्ये रिचार्ज कार्ड आणि मोबाइल द्वारे रिचार्ज पाठवत असे. त्याच्याकडून आलेल्या २९ लाख ५० हजार रुपये बँकेच्या खात्यात न भरता परस्पर अपहार केल्याचे धाडबळे यांनी दिलेल्या तक्रारीत म्हटले आहे. या तक्रारीवरुन सुदाम भांडवलकर विरोधात गुन्हा दाखल करण्यात आला आहे. सहायक लोकअभियोक्ता शरद बांगर यांनी भांडवलकर याच्या ताब्यातून लॉपटॉप जप्त करावयाचा आहे, रोख रक्कम हस्तगत करावयाची असल्यामुळे त्याला जामीन देण्यात येऊ नये अशी विनंती करण्यात केली होती.