म. टा. प्रतिनिधी, औरंगाबाद
कोविड १९ आजाराचे रुग्ण दिवसेंदिवस वाढतच आहेत. त्यामुळे नागिरकांमध्ये भीती निर्माण झाली आहे. दररोज वाढणारे रुग्ण लक्षात घेवून महापालिका प्रशासनाने शहरातील ३८ भाग अतिसंवेदनशील म्हणून जाहीर केले आहेत. त्यात भडकल गेट, न्यायनगर, मकसूद कॉलनी, जिन्सी, सिडको एन २ या नवीन पाच भागांचा समावेश करण्यात आला आहे.
महापालिकेच्या वैद्यकीय अधिकारी डॉ. मेघा जोगदंड आणि टास्क फोर्सच्या प्रमुख अपर्णा थेटे यांनी ही माहिती दिली. सध्या शहरातील करोना रुग्णांची संख्या ४७७ वर पोचली आहे, असे सांगताना डॉ. जोगदंड म्हणाल्या, मालेगाव येथून आलेल्या 'सीआरपीएफ'च्या ७३ जवानांचा त्यात समावेश आहे. त्याशिवाय २६ नवे रुग्ण आढळून आले आहेत. शुक्रवारी भडकल गेट भागातील काजीवाडा येथे करोनाबाधित रुग्ण आढळून आला. या ठिकाणी टास्क फोर्सच्या मदतीने २४ जणांच्या लाळेचे नमुने घेण्यात आले. पुंडलिकनगर हा हॉटस्पॉट झाला असून येथून ७५ जणांचे लाळेचे नमुने घेण्यात आले. संजयनगरमध्ये ४५ जणांचे नमुने घेण्यात आले. न्यायनगरमधील एक युवक करोना पॉझिटिव्ह निघाला आहे. तो एका खासगी रुग्णालयात कामाला असून पॉझिटीव्ह रुग्णाच्या डायलिसीस करताना तो संपर्कात आला. न्यायनगर भागातूनही लाळेचे नमुने घेण्यात आले. सिडको एन २ भागात देखील करोनाचा रुग्ण सापडल्यामुळे येथूनही लाळेचे नमुने घेण्यात आल्याची माहिती थेटे यांनी दिली.
\B३०७ नमुने घेतले \B
घाटी रुग्णालय, जिल्हा सामान्य रुग्णालय आणि महापालिका यांच्या माध्यमातून दिवसभरात ३०७ जणांचे लाळेचे नमुने घेण्यात आले. हे नमुने घाटी रुग्णालयातील प्रयोगशाळेत तपासणीसाठी पाठविले आहेत.