औरंगाबाद विमानतळ विस्तारासाठी ७७४ कोटींचा प्रस्ताव, पुरवणी अर्थसंकल्पात तरतूद होणार

औरंगाबाद : औरंगाबाद येथील विमानतळाच्या विस्तारीकरणासाठी ७७४ कोटींचा प्रस्ताव तयार करण्यात आला आहे. या प्रस्तावाच्या अनुशंगाने पुरवणी अर्थसंकल्पात (पुरवणी मागण्या) तरतूद करण्याचे निर्देश महाराष्ट्र विमानतळ प्राधिकरणाला देण्यात आले आहे. विस्तारीकरणात दहा विमानांच्या पार्किंगचे आणि ‘टॅक्सी-वे’चे नियोजन केले जाणार आहे.

विमानतळ विस्तारीकरणासह औरंगाबाद शहराशी संबंधित विविध विषयांवर गुरुवारी (एक डिसेंबर) मुंबई येथील सह्याद्री अतिथीगृहात केंद्रीय अर्थराज्यमंत्री डॉ. भागवत कराड यांच्या उपस्थितीत बैठक झाली. या बैठकीत झालेल्या निर्णयाची आणि चर्चेची माहिती डॉ. कराड यांनी दिली. ते म्हणाले, ‘विमानतळ विस्तारीकरणाचा विषय काही वर्षांपासून चर्चीला जात आहे. हा विषय मार्गी लागावा व विमानतळाचे विस्तारीकरण लवकरात लवकर व्हावे या दृष्टीने संबंधित यंत्रणेला निर्देश देण्यात आले. विमानतळाच्या विस्तारीकरणासाठी १६२ एकर जमीन संपादित करावी लागणार आहे. त्यासाठी साठ ते ७८ कोटी रुपये लागतील असे अधिकाऱ्यांनी सांगितले. जमीन संपादनासाठीचा ‘डीपीआर’देखील महाराष्ट्र विमानतळ प्राधिकरणाने तयार केला आहे, त्या ‘डीपीआर’ला मंजुरी देऊन जमीन संपादनासाठी आर्थिक तरतूद करण्याचे निर्देश देण्यात आले. विमानतळ विस्तारीकरणाचा एकूण प्रकल्प ७७४ कोटींचा असल्याचे अधिकाऱ्यांनी या वेळी नमूद केले. या रक्कमेची तरतूद पुरवणी मागण्यात करण्याचे निर्देश देण्याच आल्याचे डॉ. कराड म्हणाले. आर्थिक तरतूद झाल्यावर लगेचच आवश्यक ती कामे सुरू केली जाणार आहेत.

दहा विमानांचे पार्किंग करता येणार

विस्तारीकरणात विमानतळावर दहा विमानांच्या पार्किंगची व्यवस्था केली जाणार आहे. राष्ट्रीय, आंतरराष्ट्रीय विमाने औरंगाबाद विमानतळावर येण्यास सुरुवात होईल, असा विश्वास त्यांनी व्यक्त केला. विस्तारीकरणात टॅक्सी-वे ची व्यवस्थादेखील केली जाणार आहे. औरंगाबादेत उभारले जाणारे इंटरनॅशनल कनव्हेंशन सेंटर, जायकवाडी धरणावरील फ्लोटिंग सोलार प्रकल्प याबद्दलदेखील बैठकीत चर्चा झाली.