आठ लाखांचं वीज बिल आल्यानं आत्महत्या

औरंगाबाद: महावितरणच्या भोंगळ कारभारामुळे औरंगाबाद येथील एका भाजीपाला विक्रेत्याला जीव गमवावा लागला आहे. महावितरणने ८ लाखांचं वीज बिल पाठवल्यामुळे हादरून गेलेल्या या भाजीपाला विक्रेत्यानं राहत्या घरी गळफास लावून आत्महत्या केल्याची धक्कादायक घटना उघडकीस आली आहे. याप्रकरणी बिलिंग क्लर्कला निलंबित करण्यात आलं आहे.

जगनराव शेळके असं या भाजीपाला विक्रेत्याचं नाव आहे. ते गारखेडा येथील भारत नगरमध्ये राहत असून हातगाडीवर भाजी विक्रीचा धंदा करतात. त्यांना एप्रिल महिन्याचे ८ लाख ७५ हजार रुपये वीज बिल आले होते. महावितरणने पाठविलेल्या या अव्वाच्या सव्वा वीज बिलामुळे ते हादरून गेले होते. त्यांनी वीज कार्यालयात जाऊन हा प्रकार सांगण्याचा प्रयत्नही केला. पण त्याची कुणीच दखल घेतली नाही. त्यातच लाइनमनने बिल भरण्यासाठी सतत धमक्या दिल्याने शेळके प्रचंड मानसिक तणावाखाली आले होते. त्यामुळेच त्यांनी आज सकाळी राहत्या घरी आत्महत्या केल्याचं त्यांच्या कुटुंबीयांनी सांगितलं.


शेळके यांनी मृत्युपूर्वी एक चिठ्ठी लिहिली असून त्यात भरमसाठ वीज बिल आल्यानेच जीवन संपवित असल्याचं म्हटलं आहे. दरम्यान, हे वृत्त प्रसारमाध्यमांनी उचलून धरताच महावितरणने बिलिंग क्लार्क सुशील कोळी याला सेवेतून निलंबित केले आहे. गारखेडा पोलिसांनी याप्रकरणी गुन्हा दाखल केला असून अजून तपास सुरू आहे.