कालिचरण महाराजांवर सिल्लोडमध्ये गुन्हा दाखल; तेढ निर्माण करण्याचा आरोप

म. टा. प्रतिनिधी, छत्रपती संभाजीनगर : विशिष्ट समाजाच्या विरोधात आक्षेपार्ह वक्तव्य केल्याप्रकरणी कालिचरण महाराज उर्फ अभिजीत धनंजय सराग (रा. अकोला) यांच्यासह या कार्यक्रमाच्या आयोजकांच्या विरोधात सिल्लोड ग्रामीण पोलिस ठाण्यात गुन्हा दाखल करण्यात आला आहे.

या प्रकरणात सिल्लोड ग्रामीण पोलिस ठाण्यात पोलिस अंमलदार यतीन सुरेश कुलकर्णी यांनी दिलेल्या तक्रारीनुसार, १३ मे रोजी कालिचरण महाराजांच्या उपस्थितीत मोंढा बुद्रूक या ठिकाणी विराट हिंदू महासंकल्प धर्म जागरण सभा व रूद्राक्ष वाटप आयोजित करण्यात आले होते. कार्यक्रमात महाराजांनी आक्षेपार्ह व समाजात तेढ निर्माण करणारे गीतगायन केले. तसेच आक्षेपार्ह विधान केले. संयोजक कमलेश गोविंद कटारिया (रा. सिल्लोड), सुनील त्र्यंबक जाधव (रा. मोढा बुद्रूक) आणि केतन कल्याणकर (रा. सिल्लोड) यांच्याविरोधात गुन्हा दाखल करण्यात आला आहे. पोलिस उपनिरीक्षक विकास आडे तपास करीत आहेत.