म. टा. प्रतिनिधी, औरंगाबाद
शासनमान्य देशी दारूच्या दुकानाचा परवाना मिळवून देतो, असे आमिष दाखवून महिलेला तब्बल दहा लाखांचा गंडा घातल्याच्या प्रकरणात आरोपी बहादूरसिंह रामसिंह राजपूत याला सोमवारपर्यंत (१८ नोव्हेंबर) पोलिस कोठडीत ठेवण्याचे आदेश प्रथम वर्ग न्यायदंडाधिकारी ए. एस. कांबळे यांनी रविवारी दिले.
याप्रकरणी विद्या रमेश मुंडे (५०, रा. सिडको, औरंगाबाद) यांनी फिर्याद दिली होती. फिर्यादीनुसार, सीएल-तीन हा देशी दारू दुकानाचा परवाना मिळवून देतो, माझी मंत्रालयात चांगली ओळख आहे, असे आमिष आरोपी बहादूरसिंह रामसिंह राजपूत (रा. ता. मलकापूर, जि. बुलडाणा) याने फिर्यादीला दाखवले होते, मात्र या कामासाठी दहा लाख रुपये लागतील, असेही आरोपीने फिर्यादीला सांगितले होते. राजपूतवर विश्वास ठेवून फिर्यादीने त्यास दहा ऑगस्ट ते दहा सप्टेंबर २०१९ या काळात दहा लाख रुपये दिले. पैसे देऊनही परवाना मिळत नसल्याने फिर्यादीने पैशांसाठी तगादा सुरू केला होता तर, आरोपी पैसे देण्यास टाळाटाळ करीत होता; तसेच फिर्यादीच्या मुलाने फोन केला असता, त्याला ठार मारण्याची धमकीही दिली होती.
प्रकरणात फिर्यादीच्या तक्रारीवरून आरोपीविरुद्ध सिडको पोलिस ठाण्यात गुन्हा दाखल होऊन आरोपीला शनिवारी (१६ नोव्हेंबर) अटक करण्यात आली. त्याला रविवारी न्यायालयात हजर केले असता, आरोपीच्या ताब्यातील मूळ अॅग्रिमेंट व संमतीपत्र हे मलकापूर येथे जाऊन जप्त करणे; तसेच आरोपीने फिर्यादीच्या रकमेची कशी विल्हेवाट लावली, आरोपीचे कोणी साथीदार आहेत का, आरोपीवर आणखी काही गुन्हे दाखल आहेत का आदी बाबींचा तपास करणे बाकी असल्याने आरोपीला पोलिस कोठडी देण्याची विनंती सहाय्यक सरकारी वकील एस. आर. ढोकरट यांनी न्यायालयात केली. ही विनंती मान्य करून न्यायालयाने आरोपीला सोमवारपर्यंत पोलिस कोठडी सुनावली.