म. टा. प्रतिनिधी, औरंगाबाद
जागतिकीकरणानंतर उच्च शिक्षण क्षेत्रात मोठे बदल होत असून विदेशी विद्यार्थ्यांचे प्रमाण वाढले आहे. या विद्यार्थ्यांसाठी विद्यापीठात लवकरच 'एक खिडकी' उपक्रम राबविण्यात येईल, अशी माहिती कुलगुरू डॉ. प्रमोद येवले यांनी दिली. ते विदेशी विद्यार्थ्यांशी संवाद साधताना बोलत होते.
डॉ. बाबासाहेब आंबेडकर मराठवाडा विद्यापीठातील 'फॉरेन स्टुडन्ट्स सेल'च्या वतीने माजी विद्यार्थ्यांची बैठक घेण्यात आली. यावेळी कुलगुरू डॉ. प्रमोद येवले व विद्यार्थी विकास मंडळाचे संचालक डॉ. मुस्तजीब खान उपस्थित होते. या बैठकीला जवळपास ८० विदेशी विद्यार्थी उपस्थित होते. सीरिया, येमेन, केनिया, नायजेरिया व थायलंड येथून पदव्यूत्तर शिक्षण व संशोधनासाठी आलेल्या विद्यार्थ्यांचा यात समावेश होता. विदेशी विद्यार्थ्यांना ज्ञान, कौशल्य , प्रशिक्षण, संशोधन यासोबतच नवोन्मेष विकसित करण्यासाठी सहकार्य करण्यात येईल. प्रवेश ते निकाल प्रक्रिया सोपी करण्यासाठी 'एक खिडकी' उपक्रम राबविण्यात येईल, असे कुलगुरू येवले म्हणाले. विदेशी विद्यार्थ्यांसाठी ३६ खोल्यांचे अद्ययावत वसतिगृह तयार झाले असून त्याचे उद्घाटन विद्यापीठ अनुदान आयोगाचे उपाध्यक्ष डॉ. भूषण पटवर्धन करणार आहेत. येत्या १४ सप्टेंबर रोजी हा कार्यक्रम होणार आहे, असे कुलगुरूंनी सांगितले. यावेळी विद्यार्थ्यांच्या विविध प्रश्नांना कुलगुरूंनी उत्तरे दिली. 'फॉरेन स्टुडंट्स सेल'चे सहकार्य व मार्गदर्शनाबाबत विद्यार्थ्यांनी समाधान व्यक्त केले.