म. टा. प्रतिनिधी, औरंगाबाद
कारच्या धडकेत दुचाकीवरून जाणारे सिंचन विभागातील निवृत्त कनिष्ठ अभियंता पांडुरंग किसनशेठ वडनेरे (वय ६७ रा. टीव्ही सेंटर, एन १२, स्वामी विवेकानंदनगर) यांचा उपचार सुरू असताना मृत्यू झाला. हा अपघात पाच डिसेंबर रोजी कटकटगेट भागात खड्डा चुकवतांना झाला होता.
पांडुरंग वडनेरे हे पाच डिसेंबर रोजी सायंकाळी पाच वाजता कटकटगेट येथून दुचाकीवर जात होते. गेटपासून काही अंतरावर खड्डा वाचवतांना कार आणि दुचाकीत अपघात झाला होता. यावेळी दुचाकीवरून खाली पडल्याने वडनेरे यांच्या डोक्याला गंभीर दुखापत झाली होती. कारचालकाने त्यांना घाटी हॉस्पिटलमध्ये दाखल केले होते. त्यानंतर त्यांना खासगी हॉस्पिटलमध्ये दाखल करण्यात आले. त्यांनी १५ दिवस मृत्यूशी झुंज दिली, अखेर शुक्रवारी सकाळी साडे आठ वाजता त्यांचा मृत्यू झाला. त्यांच्या मृतदेहाचे घाटीत पोस्टमार्टेम करण्यात आले. या प्रकरणी जिन्सी पोलिस ठाण्यात अकस्मात मृत्युची नोंद करण्यात आली आहे. या प्रकरणी जमादार पटाईत हे तपास करीत आहेत. वडनेरे यांच्या मागे पत्नी, दोन मुले, सुना, नातवंडे असा परिवार आहे.