अक्षयतृतीयेला आंबे महागले

औरंगाबाद : अक्षयतृतीया म्हटले की आंबे आलेच, पण यंदा या साडेतीनपैकी एक मुहूर्ताच्या पूर्वसंध्येला मंगळवारी बाजारात आंब्याचे दर शंभर रुपयांपासून ३५० रुपये किलोपर्यंत होते. यामुळे नागरिकांचा हिरमोड झाला.

हापूसच्या आंब्याचा दर सुमारे ७०० ते ८०० रुपये डझन होता. याशिवाय केशर, बदाम, तोतापुरी आणि हैदराबादी लाल आंब्याच्या दर सुमारे २५० ते २७० रुपये किलो होते, असे औरंगपुरा येथील युसूफ बागवान यांनी सांगितले. दरम्यान गेल्या आठ दिवसांपासून आंब्याचे दर वाढलेलेच होते. कृषीउत्पन्न बाजार समितीत आंब्यांचे आवक २२० क्विंटल पर्यंत झाली. शहराचा आवाका, अक्षयतृतीयेचा सण पाहता ही झालेली आवक शहराला पुरेशी नाही, यामुळे आंब्यांचे दर वाढले असल्याचे सिडकोतील व्यापारी जनार्दन जाधव यांनी सांगितले. दरम्यान आंब्याची आवक घटल्याने दर वाढले. त्यामुळे अनेकांनी अक्षयतृतीया सणाला आंब्यांची खरेदी केली नसल्याने गृहिणी नाराज होता.